Իսպանական Լա լիգայում կկայանա 8-րդ տուրը: Կատալոնական «Բարսելոնա»-ն մրցակցի հարկի տակ կպայքարի «Դեպորտիվո»-ի հետ: Կատալոնացիները Լա Կորունիայում տոնել են 14 հաղթանակ, կրել 17 պարտություն, իսկ 10 խաղ ավարտվել է ոչ-ոքի: Վերջին 8 խաղերում «Դեպորտիվո»-ն «Բարսելոնա»-ի նկատմամբ սեփական դաշտում ընդամենը 1 հաղթանակ է տոնել (2008թ. ապրիլի 26-ին), իսկ վերջին 3 խաղերում «Դեպորտիվո»-ի խաղացողները չեն գրավել «Բարսա»-ի դարպասը: «Ատլետիկ»-ի ու «Ռայո Վալեկանո»-ի հետ «Դեպորտիվո»-ն ամենաթույլ պաշտպանությունն ունի Լա լիգայում (թիմն ընդունել է 14 գոլ):
Մադրիդի «Ռեալ»-ը սեփական հարկի տակ մրցելու է «Սելտա»-ի հետ: Ժոզե Մոուրինյոն կադրային լուրջ խնդիրների առջև է կանգնած, քանի որ վնասվածքներ ունեն եզրային պաշտպաններ Մարսելոն, Ֆաբիո Կոենտրաոն, Ալվարո Արբելոան: Խաղը բաց կթողնի նաև Սամի Խեդիրան, ով նույնպես վնասվածք է ստացել: «Արքայական ակումբ»-ը սայթաքելու իրավունք չունի, քանի որ «Բարսա»-ի հետ 8 միավորի տարբերություն կա մրցաշարային աղյուսակում:
Մադրիդյան մյուս ակումբը՝ «Ատլետիկո»-ն, որը վաստակած 19 միավորով առաջին հորիզոնականը կիսում է «Բարսելոնա»-ի հետ, մրցակցի հարկի տակ իր ուժերն է չափելու «Ռեալ Սոսյեդադ»-ին հետ: Կկայանան նաև հետևյալ հանդիպումները՝ «Մալագա» – «Վալյադոլիդ», «Վալենսիա» – «Ատլետիկ», «Խետաֆե» – «Լևանտե», «Էսպանյոլ» – «Ռայո Վալեկանո», «Գրանադա» – «Սարագոսա», «Օսասունա» – «Բետիս», «Սևիլիա» – «Մալյորկա»:
