ԱԺ «Բարգավաճ Հայաստան» խմբակցության պատգամավոր, ԱԳ նախկին նախարար Վարդան Օսկանյանի գործի դատաիրավական փորձաքննության եզրակացությունը և մեղադրանքի որոշումը ներկայացնում են այնպես, ինչպես իրենք են ցանկանում. այսօր լրագրողների հետ հանդիպման ժամանակ այս մասին ասաց Վարդան Օսկանյանի փաստաբան Տիգրան Աթանեսյանը` մանրամասնելով Օսկանյանի գործի հիմնական բացթողումները:
Նա հստակեցրեց, որ Օսկանյանի գործով ոչ մի նախաքննություն էլ չկա, քողարկված նախաքննություն է: «Առաջին անգամ հարցաքննության հրավիրվելիս` Վարդան Օսկանյանը մանրամասն ցուցմունք է տվել, բոլոր հարցերին սպառիչ պատասխան է տվել, իսկ լռության իրավունքից օգտվելն իր քաղաքացիական իրավունքն է. նա սրան դիմել է համոզվելուց հետո, որ իր դեմ քաղաքական հետապնդում է իրականացվում:
Նա բազմիցս էլ ասել է` խնդիր չկա, թող ստուգեն իր բանկային հաշիվները, բոլոր ծախսերն այնպիսին են, որ «Սիվիլիթաս»-ի գումարը միշտ տեղում է եղել: Երկու օր առաջ հիմնադրամի հաշվին փոխանցվեց բարեգործությունից իր հաշվին մնացած գումարը, թեև պարոն Օսկանյանը չէր ցանկանում փոխանցել, դա իմ պահանջն էր, որը նա հարգեց. ակնկալվում էր, որ այն կմնար արգելանքի տակ և կկորչեր»,- պարզաբանեց փաստաբանը` շարունակելով, որ հիմնադրամն այդ գումարի կարիքը չուներ, այդ պատճառով չէր փոխանցվել, այս պահին հիմնադրամը ութ հարյուր հազարի կարիքը չուներ, դա արվել է, որ չկորչի գումարը:
Աթանեսյանի համոզմամբ` այս գործում իրավաբանություն քիչ կա, այս գործի վարույթները կապված են ոչ թե բուն տվյալների, այլ քաղաքական զարգացումների հետ: Ուստի փաստաբանը հստակեցրեց, որ եթե գործում լիներ իրավաբանական բաղադրամասը, այն ենթակա էր կարճման, որովհետև գործում իսկապես տրամաբանություն չկա. «Ոչ թե ես փաստաբանն եմ և պարտավոր եմ այդպես ասել, ես չգիտեմ՝ ինչ ասել իմ վստահողին այս երկրում: Եթե կա քաղաքական պատվեր՝ իրավական պաշտպանության միջոցներ չկան: Սա քաղաքական պրոցեսների հետ է կապված»:
Փաստաբանի տեղեկացմամբ` առաջիկայում իր կողմից կներկայացվի միջնորդությունը գործը կարճելու մասին:
Հարցին՝ ինչպե՞ս է վերաբերվում ԱԺ Հանրապետական խմբակցության պատգամավորների պնդումներին, թե Օսկանյանը պետք է ապացուցի իր անմեղությունը և ցուցմունք տա, Տիգրան Աթանեսյանը պատասխանեց, թե երևի այդ խմբակցությունում մարդիկ կան, որ մտածում են, թե երբ են իրենց անմեղությունն ապացուցելու՝ «որովհետև բոլորդ եք հասկանում, որ նման արտահայտությունն իրավական անգրագիտություն է»:
Հիշեցնենք, որ Օսկանյանին մեղադրանք է առաջադրել ՀՀ ՔՕ 179 (ուրիշի ունեցվածքի առանձնապես խոշոր չափերի յուրացում) և 190 (անօրինական ճանապարհով ձեռք բերված եկամուտների լեգալացում) հոդվածների հատկանիշներով:
