Վրաստանի նախագահ Միխեիլ Սաակաշվիլիին աջակցող քաղաքացիները դժգոհ են մնացել Օլեգ Տոբակովի Մոսկվայի թատրոնի «Ամեն իմաստունի բավական է պարզությունը» ներկայացումից, որը սեպտեմբերի 26-ին ցուցադրվել է Թբիլիսիում: Նման վերաբերմունքի պատճառը, նախագահի կողմնակիցների բնութագրմամբ, էթիկայի նորմերին հակասող ակնարկն էր այն դրվագին, որտեղ Սաակաշվիլին հոգեկան շփոթմունքի պահին ծամել է իր փողկապը: Այս մասին հայտնում է Интерфакс-ը՝ հղում անելով վրացական ԶԼՄ-ներին:
Ակնարկը վերաբերում էր 2008 թվականի օգոստոսին տեղի ունեցած ռուս-վրացական պատերազմի այն դրվագին, երբ Վրաստանի առաջնորդը կարևոր հեռախոսային խոսակցության ժամանակ տեսախցիկների կողմից ֆիքսվել էր՝ փողկապը բերանում: Դրվագը կենդանացրել էր ռուս դերասան Սերգեյ Բեզռուկովը:
Ներկայացման ավարտին Սաակաշվիլիի կողմնակիցները հայտարարել էին, որ դրանում տեսել են համեմատություն՝ ռուսական կայսրության և դրա տիրապետության տակ գտնվող Վրաստանի միջև: Հանրության ռեակցիան նրանք ստորացուցիչ են անվանել, քանի որ նրանք հոտնկայս, բավականին երկար ծափահարել են դերասաններին:
Ներկայացումը ցուցադրվել է Ռուսթավելիի անվան թատրոնում՝ Թբիլիսիի միջազգային թատերական փառատոնի շրջանակում: Բեզռուկովի խաղն առաջացրել է հանրության հրճվանքը:
