Շիրակի մարզպետարանում արդեն պայմանագրեր են կնքվել վրացական պետհամարանիշերով ավտոմեքենաների այն սեփականատերերի հետ, ովքեր հասցրել են մարզպետարանի տրանսպորտի բաժին ներկայացնել անհրաժեշտ փաստաթղթերը: Միաժամանակ շարունակվում է նաև պայմանագիր կնքելու վերաբերյալ մյուս վարորդների հայտերի ընդունումը:
Մինչ օրս 657 մեքենայից հաշվառվել է 302 մեքենայի փաստաթուղթ: Անտոկոս վարկերից օգտվելու հնարավորություն ոչ բոլորն ունեն: Դրանցից 71-ի համար պահանջվել է սահմանվածից բարձր մաքսային տուրք կամ դրանք վերջին հինգ տարվա արտադրության են: Հետևաբար նրանք ծրագրից չեն կարող օգտվել:
«288-ի ցուցակները երեքշաբթի ուղարկվել են մաքսային ծառայություն: Նրանցից 116-ի վերաբերյալ ստացվել է մաքսային արժեքի մասին տեղեկատվություն»,- ասում է Շիրակի մարզպետարանի քաղաքաշինության բաժնի պետ Ալբերտ Մարգարյանը:
Մյուսների մասին տեղեկատվությունը կստացվի առաջիկայում, և սահմանված չափանիշներին համապատասխանելու դեպքում նրանց ևս անտոկոս վարկեր վերցնելու հնարավորություն կտրվի: Այս գործընթացը ավտովարորդները տարբեր կերպ են մեկնաբանում։
Պայմանագիր կնքելու համար պետք է ներկայացվեն անձնագրի, սոցիալական քարտի, սահմանը վերջին անգամ հատելու ժամանակ մաքսային ծառայությունից տրված հայտարարագրի կրկնօրինակները: Չմաքսազերծված ավտոմեքենաների սեփականատերերը գործընթացից օգտվելու համար ունեն ավելի քան երեք շաբաթ: Պայմանագրերի կնքման վերջնաժամկետը մարտի 25-ն է:
