Գեղարքունիքի մարզում դպրոցը փակվել է, սակայն փակվել է օպտիմալացման արդյունքում: Այսօր ԱԺ-ում 2011թ. բյուջեի կատարողականի քննարկումների ժամանակ նման հայտարարություն արեց Գեղարքունիքի մարզպետ Ռաֆիկ Գրիգորյանը՝ պատասխանելով ՀԱԿ պատգամավոր Նիկոլ Փաշինյանի հարցադրմանը՝ ճի՞շտ է արդյոք, որ փակվել է Բարեպատի դպրոցը, ինչի մասին այդքան գրում է մամուլը:
Ըստ Ռ. Գրիգորյանի՝ Բարեպատի փոքր դպրոցը օպտիմալացման ծրագրի շրջանակներում միացվել է 1960 տեղանոց դպրոցին: Մարզպետը հայտարարեց, որ Գեղարքունիքում աշակերտների թվի խնդիր չկա, և դպրոցականների թվի աճ է արձանագրվել:
Ռ. Գրիգորյանը, վրդովվելով Փաշինյանի հարցերից, սկսեց բացատրել, թե սա բյուջեի կատարողականի քննարկում է, ոչ թե սոցիալական կամ գյուղատնտեսական ծրագրերի իրականացման, ու խորհուրդ տվեց գյուղծրագրերին ծանոթանալու համար դիմել ոլորտի նախարարին, իսկ ինքը պարտավորվեց, դեռ պաշտոնավարման 100 օրը չլրացած, ասուլիս հրավիրել՝ պատասխանելու բոլոր հարցերին և Փաշինյանին հրավիրեց անձամբ այցելել մարզ:
Ն. Փաշինյանը հակադարձեց, որ բյուջեի քննարկումը միայն թվերի պարզ ներկայացում չէ. «Կարող եք կառավարության նիստում հայտնել շնորհակալություն: Մարզեր եք հրավիրում, դա փակ չի, վիզա պետք չի, մենք առանց դա էլ կարող ենք այցելել մարզեր: Մենք բյուջե ենք քննարկում»:
