Հիշեցնենք, որ նախորդ հանրահավաքի ընթացքում Տիգրան Կարապետյանը 18 կետից բաղկացած վերջնագիր էր ներկայացրել իշխանություններին և խոստացել, որ դրանք չկատարելու դեպքում փետրվարի 28-ի հանրահավաքում կարմիր քարտ է ցույց տալու իշխանություններին: Պարզից էլ պարզ է, որ իշխանությունները այդ կետերը չէին կատարելու, և առնվազն միամտություն կլիներ կարծել, որ այդ կետերից գոնե մեկը իրականացվելու էր: Սակայն նշենք, որ ԺԿ առաջնորդ Տիգրան Կարապետյանը բացի կարմիր քարտերից, վճռական գործողություններ ևս խոստացել էր, մասնավորապես` պետք է անվստահություն հայտնեին իշխանություններին: Սակայն, ինչպես սպասվում էր, հանրահավաքն անցավ բավականին խաղաղ մթնոլորտում` առանց վճռական քայլերի, հերթական ելույթներից բաղկացած, և բացի Կարապետյանի մրցավարական ֆունկցիաները կատարելուց ու կարմիր քարտ ցույց տալուց` հետաքրքիր այլ բան չեղավ:
Հանրահավաքն սկսվեց ավանդական դարձած հայտարարությամբ, թե ճանապարհները փակել են և իրենց սակավաթվության պատճառն այն է, որ մարզերի համակիրները չեն կարողացել հասնել Երևան: Թերևս այս հանրահավաքի միակ նորությունն այն էր, որ այնտեղ էին «Սարդարապատ» շարժման նախաձեռնող խմբի ղեկավար Ժիրայր Սեֆիլյանը և շարժման անդամ Տիգրան Խզմալյանը, ինչպես նաև «Ղարաբաղ» կոմիտեի անդամ Աշոտ Մանուչարյանը: Թե՛ Սեֆիլյանը, թե՛ Խզմալյանը մեզ հետ զրույցում նշեցին, որ իրենք չեն եկել միանալու Տիգրան Կարապետյանին, այլ պարզապես եկել են խոսք ասելու իրենց ժողովրդին և իրենք ամենուր են, որտեղ կա համախմբված ժողովուրդ:
Սեֆիլյանը նշեց, որ իրենց շարժմանը կուսակցապետերը չեն հետաքրքրում. ««Սարդարապատ» շարժումը կուսակցություն չէ, և մենք համոզված ենք, որ ժողովրդին այս վիճակից հանողը կուսակցությունները չեն, այլ համախմբված ժողովրդի պայքարը»: Սեֆիլյանը նշեց նաև, որ Տիգրան Կարապետյանը իրենց պարբերաբար հրավիրել է հանրահավաքին, և իրենք այսօր որոշել են մասնակցել, քանի որ թե՛ այս օրը, թե՛ վաղը` Մարտի 1-ը, ունեն մեծ խորհուրդ, և «Սարդարապատ» շարժումը խոսք ունի ասելու ժողովրդին:
«Ղարաբաղ» կոմիտեի անդամ Աշոտ Մանուչարյանն էլ կոչ արեց հայտարարել ընտրել մի օր, և այդ օրն անվանակոչել ժողովրդի օր, երբ որոշումը լինելու է ոչ թե նախագահներինը կամ չինովնիկներինը, այլ ժողովրդինը. «Այս 20 տարվա ընթացքում շատ են եղել ծանր տարիները` պատերազմ, երբ ռազմաճակատի գիծը համարյա հասել էր Ստեփանակերտին, և մենք կարծում էինք, որ դրանից ավելի ծանր բան չէր կարող լինել: Սակայն այսօր իրավիճակը հարյուրապատիկ ավելի ծանր է, և պատճառը մեկն է` այն ժամանակ մեզ շրջապատող հանգամանքներն էին ծանր, բայց մեր կամքը, մեր միասնությունը ոչ մի արգելքի առջև չէր կանգնում: Այսօր մենք կորցրել ենք հույսը, հավատը, ջերմությունը միմյանց նկատմամբ»:
ԺԿ առաջնորդ Տիգրան Կարապետյանն էլ իր ելույթում նշեց, որ հաջորդ հանրահավաքի ընթացքում իրենք ոչ թե կարմիր քարտ են ցույց տալու իշխանություններին, այլ պահանջելու են, որ հեռանան:
Ի դեպ, հանրահավաքին հավաքվածներն ավելի կառուցողական առաջարկ էին անում` կարմիր քարտ ցույց տալ կառավարական շենքի դիմաց, ինչը սակայն կա՛մ չլսվեց, կա՛մ էլ չլսելու տրվեց կազմակերպիչների կողմից:
Իսկ վերջում Տիգրան Կարապետյանը շատ հետաքրքիր և իշխանությունների ձեռագրին բնորոշ առաջարկ արեց ժողովրդին. «Եթե հաջորդ հանրահավաքին ամեն մեկդ ձեզ հետ բերեք 10 հոգի, կտեսնեք, թե մենք ինչ ենք անելու»:
Անժելա Խաչատրյան, «Ժամանակ» օրաթերթ
