«Ռոսսելխոզնադզորն» արգելել է Ռուսաստան ներմուծել իսլանդական Vinnslustooin HF ձեռնարկության և հայկական «Ակվատեխավտոմատիկա» ՓԲԸ-ի արտադրատեսակները: Այս մասին տեղեկացնում է NovostiNK.ru-ն:
Լրատվամիջոցը գրում է, որ «Ռոսսելխոզնադզոր»-ի տեղեկություններով՝ Իսլանդիայից ներմուծվող սառեցված սկումբրիայի և Հայաստանից ներմուծվող իշխանի խմբաքանակում հայտնաբերվել է աղիքային ցուպիկ: Այս ձեռնարկությունները նախկինում ևս ընկնում էին պահանջները խախտողների «սև ցուցակում», որոնք ՌԴ արտադրատեսակներ էին ներմուծում:
«Ռոսսելխոզնադզորը» նաև խիստ վերահսկողություն է սահմանել այնպիսի մսային և ձկնային արտադրատեսակների վրա, որոնք ներմուծվում են Բրազիլիայից, Դանիայից, Լիտվայից, Ուկրաինայից, Չինաստանից և Իսպանիայից՝ հաշվի առնելով այդ արտադրատեսակներում հայտնաբերված աղիքային ցուպիկի բակտերիաները: Վերահսկողությունն ուժեղացել է նաև լիտվական ձեռնարկություններից ստացվող կաթնամթերքի վրա՝ կաթնաշոռում խմորիչի քանակություն հայտնաբերելու պատճառով:
Արգելքն ուժի մեջ է մտնում սեպտեմբերի 27-ից:
Լրատվամիջոցը նաև հիշեցնում է, որ սեպտեմբերի 13-ին ՌԴ-ն սահմանափակել էր էստոնական N259 (АО Smakus) ընկերության ձկնատեսակների ներմուծումը՝ սաղմոններում հայտնաբերված աերոբ ու ֆակուլտատիվ անաերոբ միկրոօրգանիզմների հայտնաբերման պատճառով: Բացի այդ, սեպտեմբերի 13-ից ՌԴ-ն արգելել էր նաև դանիական NGL219 (M/TR Markus, Qajaq Trawl A/S) ընկերության արտադրատեսակների ներմուծումը՝ մանր ծովախեցգետնի խմբաքանակում մկնդեղ հայտնաբերելու պատճառով:
