Տեր Եսայի քահանա Արթենյանի կարծիքով՝ այսօր մեզանում շատացել են արտամուսնական կապերը, քանի որ փոխվել է մարդկանց մտածելակերպը. շատերը կարծում են, թե ավանդականը հնացել է: Քահանան լրագրողների հետ հանդիպմանը ասաց, որ այս խնդրով շատ են գալիս եկեղեցի և դիմում իրենց. «Արտամուսնական կապերի հիմքում ընկած է բարոյականության անկումը: Այսպիսի կապեր ունենում են հիմնականում երիտասարդ տղաները, ովքեր դեռևս ձևավորման փուլում են»:
Բանախոսի կարծիքով՝ նման դեպքերից խուսափելու համար պետք է վերադառնալ մեր բարոյական կերպարին: Հայի ազգային նկարագրում չպիտի լինի «արտամուսնական կապ» հասկացությունը, որովհետև դա մեր ազգի բարոյական նկարագրին հարիր չէ: Իսկ ինչ վերաբերում է մուսուլմանին պսակադրելուն, քահանան ասաց, որ ինքը նման պսակ չի կատարում: Այժմ դժվարացել է նաև մուսուլմաններին մկրտելու կարգը, քանի որ շատերը, հատկապես իրանցիները, դա անում են ուղղակի ԱՄՆ գնալու համար:
Ասուլիսի մյուս բանախոս` հոգեբան Միհրդատ Մադաթյանն էլ ասաց, որ երեխային դեռևս ընտանիքից պետք է սովորեցնել ընտանիքի արժեքները: Շատ դեպքերում զույգերը ուշադրություն դարձնելով սոցիալ-տնտեսական վիճակի վրա` մոռանում են բարոյական արժեքների մասին. «Այսօր երկու սեռի ներկայացուցիչներն էլ շատ են ուշադրություն դարձնում նյութական արժեքների վրա, ինչի արդյունքում կորչում է ընտանիք գաղափարը»:
Հոգեբանն ասաց նաև, որ հայ աղջիկներից շատերը ընտրում են արտասահմանցի ամուսին՝ զուտ այստեղից փախչելու համար:
Լուսանկարը՝ PanARMENIAN Photo-ի
