«Հայկական ժամանակ»-ը գրում է, որ «Բարգավաճ Հայաստան» կուսակցության ներկայացուցիչները երեկ համառորեն փորձում էին հերքել մամուլի այն հրապարակումը, ըստ որի` ԲՀԿ առաջնորդ Գագիկ Ծառուկյանը կուսակցության Մասիսի ակտիվի հետ հանդիպման ժամանակ հայտարարել է, թե Սերժ Սարգuյանին նախագահական ընտրություններում աջակցելու համար վերջինիս առաջ երկու պայման է դրել: Ծառուկյանը Սերժ Սարգսյանից պահանջել է ԲՀԿ-ին տալ կառավարության 30 տոկոսը և վարչապետի փոփոխություն կատարել: «Եթե նա կհամաձւսյնի իմ պայմանին, ապա մենք կսատարենք նրան, եթե` ոչ, ապա ես ինքս կառաջադրվեմ նախագահի թեկնածու»,- ըստ «Հրապարակի», ասել է Ծառուկյանն իր թիմակիցներին:
Սույն հրապարակման կապակցությամբ ԲՀԿ խոսնակ, Աժ պատգամավոր Տիգրան Ուրիխանյանը երեկ մի քանի անգամ կրկնեց արդեն անգիր արած հայտարարությունը. «Նախագահական ընտրությունների մասին խոսելու ենք պատեհ պահին, երբ գտնենք նպատակահարմար: Ասեկոսեներ և այլ բաներ չեմ մեկնաբանում»: ԲՀԿ Արարատի մարզային կառույցի ղեկավար, Աժ պատգամավոր Տիգրան Ստեփանյանն էլ պնդեց, որ տեղեկությունն իրականությանը չի համապատասխանում: Մասիսի ԲՀԿ-ական քաղաքապետ Դմիտրի Նազարյանի հետ «ՀԺ»-ի զրույցը, սակայն, այլ բան էր հուշում, թեև նա նույնպես փորձում էր քողարկել իրականությունը:
– Պարոն Նազարյան, տեղեկություններ կան, որ Մասիսի ԲՀԿ ակտիվի հետ Ծառուկյանի հանդիպման ժամանակ նախագահական ընտրությունների մասին է խոսվել:
– Ես չեմ լսել: Հանդիպման ժամանակ եղել է, որ միասին ենք եղել, եղել է, որ առանձին զրույցներ են եղել, ես նման բան չեմ լսել:
– Տեղեկություն կա, որ Ծառուկյանն ասել է` կարող է ինքն առաջադրվի նախագահի թեկնածու:
– Դե, այդպես մի հատ չգիտեմ` կատակի ձևով ոնց որ իր մասին… որ ժողովուրդը սենց բան է ասում: Ասեց` հա, իմ մասին էլ են սենց բաներ խոսում:
– Որ նախագահի թեկնածու առաջադրվի՞:
– Այո:
– Իսկ վարչապետի փոփոխության մասի՞ն:
– Ես նման բան չեմ լսել:
«Այն, որ ԲՀԿ-ն Աժ ընտրություններից հետո ՀՀԿ-ի հետ կոալիցիա չկազմեց, քանի որ Սերժ Սարգսյանը հրաժարվեց փոխել վարչապետին, շատերին է հայտնի: Իսկ ինքը` Գագիկ Ծառուկյանը, երեկ վարչապետին քննադատելու առիթը բաց չէր թողել: ԲՀԿ-ի վերահսկողության տակ գտնվող կայքերից մեկին անցած օլիմպիական խաղերի վերաբերյալ տված հարցազրույցում նա ասել էր. «Հիշեք, թե Ծառուկյանն արդեն քանի տարի է ասում, որ երկրի տնտեսության վիճակը լավ չէ, ժողովրդի սոցիալական վիճակը ծանր է, արտագաղթի տեմպերը մտահոգիչ են: Մարդկանց մոտ հուսալքությունն ուժեղանում է: Քանի՞ տարի է` ես ասում եմ` երկրում լուրջ փոփոխություններ են պետք: Հենց նաև այդ պատճառով մենք հրաժարվեցինք մաս կազմել կոալիցիային»,- հավելում է «ՀԺ»-ը:
