8 աղջիկների պոռնկությամբ շահագործած կանանց հանցախմբի դռնփակ դատավարությունը Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր անորոշ ժամանակով հետաձգվել է, ինչը պայմանավորված է դատավարությունը նախագահող դատավոր Գագիկ Պողոսյանի հոր մահվամբ:
Ամբաստանյալ Հասմիկ Առաքելյանի պաշտպան Կարեն Քամալյանը «Առաջին լրատվական»-ին հայտնեց, որ դատարանը արդեն ավարտել է տուժողների հարցաքննման փուլը և հարցաքննում է գործով վկաներին: Հիմնավորվո՞ւմ է դատարանում ամբաստանյալների նկատմամբ առաջադրված մեղադրանքը, թե՞ ոչ` ամբաստանյալի պաշտպանն առայժմ չցանկացավ ասել, սակայն նշեց, որ երկարատև դատավարությունն արդեն մոտենում է ավարտին:
Նշենք, որ քանի դեռ նիստերը վերաբերում են տուժողների անձնական կյանքին, դատական նիստերը կանցկացվեն դռնփակ:
Հիշեցնենք, որ Աղունիկ Այվազյանին մեղադրանք է առաջադրվել այն բանի համար, որ նա, մարդու թրաֆիքինգի` շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ստանալու, ինչպես նաև սեռական` պոռնկության շահագործման վիճակի մեջ դնելու ու պահելու դիտավորությամբ, միավորվելով Արաբական Միացյալ Էմիրություններում բնակվող Նելլի Ներսիսյանի, վերջինիս միջոցով՝ նաև Ծովիկ Ավետիսյանի, Վահան Ավետիսյանի, Հասմիկ Առաքելյանի, Ազատուհի Հայրապետյանի, Աշոտ Ներսիսյանի, Սիլվա Հովսեփյանի, ոմն Նառայի, Սերինեի և քննությամբ դեռևս չպարզված այլ անձանց հետ, ստեղծել է կազմակերպված հանցավոր խումբ։ Իրենց հանցավոր մտադրությունը իրագործելու նպատակով հավաքագրված կանանցից վերցրել է անձնագրերը, ապա առողջության համար վտանգավոր բռնություն գործադրելու սպառնալիքով և ոչ վտանգավոր բռնության գործադրմամբ, վիճակի խոցելիությունը օգտագործելով, ներգրավել է նրանց մարմնավաճառության մեջ` տևական ժամանակ դնելով և պահելով պոռնկության շահագործման վիճակի մեջ ու ստացել նրանց կողմից վաստակած գումարները։
Ամբաստանյալներ Աղունիկ Այվազյանը և Հասմիկ Առաքելյանը մեղադրվում են ՀՀ քրեական օրենսգրքի 132 հոդվածի 3-րդ մասի 1-ին կետով և 132.2 հոդվածի 3-րդ մասի 1-ին կետով, ամբաստանյալներ Ծովիկ Ավետիսյանը և Վահան Ավետիսյանը մեղադրվում են քր. օր 132 հոդվածի 3-րդ մասի 1-ին կետով, ամբաստանյալներ Վահագն Ավետիսյանը և Մարիամ Սարգսյանը մեղադրվում են քր.օր 132 հոդվածի 2-րդ մասի 2-րդ կետով, ամբաստանյալներ Արմեն Վասիլյանը և Հեղուշ Վասիլյանը մեղադրվում են քր. օր 132.2 հոդվածի 2-րդ մասի 2-րդ կետով նախատեսված հանցանք կատարելու մեջ:
