Ֆիտչի կողմից որևէ երկրին տրված վարկանիշային գնահատականը (Հայաստանինը՝ BB-) եթե հեռանկարային իմաստով անկում է ապրում, դա ամբողջ աշխարհում ընթացող պրոցես է, քանի որ ամբողջ աշխարհն է ճգնաժամի մեջ, և հեռանկարներ, որ ճգնաժամից դուրս կգա, չկան: Դրա համար աշխարհի բոլոր պետությունները գտնվում են հեռանկարային իմաստով վատ վիճակում: «Առաջին լրատվական»-ի հետ զրույցում նման տեսակետ հայտնեց կառավարման փորձագետ Հարություն Մեսրոբյանը: Նրա խոսքով, օրինակ՝ ԱՄՆ-ի վարկանիշը AAA է, բայց անգամ այս պարագայում հեռանկարը լավը չի, հետևապես՝ այս հեռանկարային մասն անհանգստացնող չէ:
«Այլ բան է, որ Հայաստանում այդ հեռանկարայինի պայծառ չլինելը ոչ միայն միջազգային ճգնաժամի և աշխարհում վատ սպասումների հետևանքն է, այլ նաև Հայաստանում մենք ունենք ներքին վատ սպասումներ: Մենք պետք է այս երկու տեսանկյունից միշտ գնահատենք սպասումնային մասը»,- նշեց Հ. Մեսրոբյանը:
Հարցին՝ ներդրումներ ներգրավելու տեսակետից ի՞նչ ազդեցություն ունի ՀՀ-ին տրված վարկանիշը, փորձագետը պատասխանեց, որ ամբողջ աշխարհում գիտեն, որ Հայաստանում տնտեսությունն օլիգարխացված է, իսկ նման տնտեսությունում հիմնականում լուրջ ներդրում չի գալիս ու մենք չենք կարող լինել բացառություն. «Այդ վարկանիշերը հաճախ պաշտոնական և որոշ չափով խեղաթյուրված թվային բազայի հիման վրա և որոշակի մոնիտորինգի արդյունք են, բնական է, որ դրսից նայողը շատ մանրամասներ չի կարող նկատել: Բայց այնուամենայնիվ, միտումների մասին բոլորը տեղյակ են և հասկանում են, որ եթե չկա մրցակցություն, լուրջ ներդրում չի կարող լինել: Կարող են լինել ինչ-որ ներդրումներ օֆշորային, բայց ոչ լուրջ կազմակերպությունների միջոցով»:
