BBC-ի հաղորդմամբ Alcatel-Lucent հեուստահաղորդակցային սարքավորումներ արտադրող ընկերությունը, ծախսերը կրճատելու նպատակով նախատեսում է աշխատանքից հեռացնել մոտ 5000 աշխատակցի: Ընկերության բաժնետոմսերն արժեզրկվել են 6 %-ով: Աշխատակիցների 6.4 %-ով կրճատումը ընկերությանը հնարավորություն կտա խնայել 750 մլն եվրո:
Մոտ մեկ շաբաթ առաջ ֆրանս-ամերիկյան այս ընկերությունը հաշվետվություն էր հրապարակել եռամսյակային կորուստների մասին, որից հետո նրա բաժնետոմսերը շուկայում ընկան միանգամից 15 %-ով: Հինգշաբթի բաժնետոմսերի արժեզրկման մասին հայտարարությունից հետո դրանք արժեզրկվեցին ևս 5.5 %-ով:
Ներկա պահին ընկերության` աշխարհով մեկ տարածված գրասենյակներում աշխատում է 78 000 աշխատակից:
Նշենք, որ Alcatel ընկերությունը սարքավորումներ է տրամադրում կապի համաշխարհային օպերատորներին, որոնք ճգնաժամի պատճառով կրճատել են վաճառքի ծավալներ: Alcatel-ից բացի՝ ասիական նմանատիպ ընկերությունների ( Huawei Technologies և ZTE) հետ մրցակցության պատճառով, գները ստիպված են իջեցնել նաև մրցակից մյուս ընկերությունները` Ericsson-ը և Nokia Siemens Networks-ը: Nokia Siemens Networks-ը վերջիններիցս ևս ստիպված է եղել դիմելու կրճատումների` աշխատանքից հեռացնելով 17 000 աշխատակցի:
