Սիրիայի կառավարությունը զգալի ուժեր է կենտրոնացրել Հալեպ քաղաքի մերձակայքում՝ պատրաստվելով գրոհի: Այս մասին հաղորդում է Agence France-Presse-ը՝ վկայակոչելով իր տեղեկացված աղբյուրները:
«Ամբողջ չորեքշաբթի և հինգշաբթի քաղաքի ծայրամասերում հատուկջոկատայինների ստորաբաժանումներ են տեղակայվում, բացի այդ՝ անընդհատ նրանք համալրվում են: Հարձակումը կսկսվի ուրբաթ կամ շաբաթ»,- հայտարարել է Սիրիայի ՊՆ-ին մոտ կանգնած գործակալության զրուցակիցը:
Նրա խոսքերով՝ Դամասկոսում գիտեն, որ ապստամբները նույնպես համալրում են ստանում: Որոշ գնահատականներով՝ Հալեպ են ժամանել մինչև 1000 զինյալ, արդեն քաղաքում գտնվողները նույնպես պատրաստվում են գրոհին:
Ակնկալվում է, որ մարտերը կընթանան քաղաքի արևելյան և արևմտյան հատվածներում, որոնք գտնվում են ընդդիմության հսկողության տակ: Ընդդիմության առաջնորդները հայտնել են, որ կառավարությունը քաղաքին է մոտեցրել առնվազն 100 տանկ, և տասնյակ միավոր այլ ռազմատեխնիկա:
Ապստամբների և բանակի հնարավորությունները համեմատելու խնդրանքին ընդդիմութան առաջնորդներից մեկը՝ գնդապետ Աբդել ջաբար Ալ- Օկադին, ասել է. «Անգամ համեմատելու բան չկա: Նրանք տանկեր ունեն, մենք՝ հիմնականում հրազենային զենք: Բայց մենք ունենք հավատ ու մեր պայքարը»:
Հալեպը համարվում է երկրի տնտեսական մայրաքաղաքը և ֆինանսական կենտրոնը, ուստի այն կարևոր ռազմավարական նշանակություն ունի երկու կողմերի համար:
