Արգենտինայի նախագահ Քրիստինա Քիրշները հայտարարել է, որ 100 պեսոյանոց նոր թղթադրամների վրա կհայտնվի երկրի նախկին նախագահ Խուան Պերոնի կնոջ՝ Եվայի պատկերը: Այս մասին հաղորդում է The Daily Telegraph-ը: Նա կդառնա առաջին կինը, որի պատկերը կհայտնվի արգենտինական թղթադրամների վրա: Ներկայում 100 պեսո անվանական արժեքով թղթադրամների վրա պատկերված է XIX դարի քաղաքական գործիչ Խուլիո Արխենտինո Ռոկայի նկարը:
Քիրշների խոսքով՝ սկզբում Եվա Պերոնի պատկերով թղթադրամները կթողարկվեն սահմանափակ քանակով: Դա կապված է նրա մահվան 60-րդ տարելիցի հետ: Սակայն նախագահը նշել է, որ ապագայում 100 պեսոյանոց բոլոր թղթադրամների վրա պատկերված կլինի Եվա Պերոնը:
Նախագահը նշել է, որ այդ կերպ անհրաժեշտ է պատվել իգական սեռը, իսկ լավագույն տարբերակ, քան Եվան, չկար: Քիրշների խոսքով՝ նա համեստ կին էր, սակայն կատաղի պայքարում էր արդարության և հավասարության համար:
«Նրա հիշատակը հարգելը նույնն է, ինչ արդարությունը վերականգնելը»,- ասել է նախագահը:
Եվա Պերոնը ծնվել է 1919 թվականին՝ Բուենոս Այրեսից ոչ հեռու գտնվող գյուղական վայրում: Երիտասարդ տարիներին նա աշխատել է որպես մոդել և դերասան: 1944 թվականին ամուսնացել է Խուան Պերոնի հետ, որն այդ ժամանակ զբաղեցրել է երկրի աշխատանքի նախարարի պաշտոնը: 1946 թվականին նախագահական ընտրություններում հաղթելուց հետո Եվան ամուսնուն աջակցելու նպատակով ստեղծել է քաղաքական կուսակցություն և գործել որպես քաղաքական գործիչ՝ անձնական հանդիպումներ ունենալով արտասահմանյան պետությունների ղեկավարների հետ:
