Այս տարի գյուղատնտեսական տարին կփակենք ոլորտի 8-9 տոսանոց աճով: Այսօր կառավարությունում հրավիրած ասուլիսում նման կանխատեսումներով հանդես եկավ գյուղնախարար Սերգո Կարապետյանը: Նա նշեց, որ այս տարվա առաջին կիսամյակում նախորդ տարվա նույն ժամանակահատվածի համեմատ գյուղատնտեսության համախառն արտադրանքի ծավալն արդեն իսկ ավելացել է 8.1 տոկոսով: Շատ է հատկապես ծիրանի, դեղձի և խաղողի բերքը:
Սերգո Կարապետյանը հավատացրեց, որ այս տարի մթերումների խնդիրներ չեն լինի: Առաջիկայում կսկսվի դեղձի և լոլիկի մթերումը: Խաղողի մթերման գինն, ըստ նախարարի, այս տարի հաստատ չի իջնի:
Ինչ վերաբերում է հացահատիկային մշակաբույսերին, ապա, ըստ Սերգո Կարապետյանի, թեև մեկ հեկտարի հաշվով այս տարի քիչ բերք կստացվի, սակայն ընդհանուր բերքի ծավալն 3-4 տոկոսով ավելի կլինի: Չմշակվող հողատարածքների թիվն այս տարի նվազել է 7 տոկոսով, 22 հազար հա ավելի հացահատիկային կուլտուրա է ցանվել:
Անդրադառնալով գյուղացիների այն բողոքներին, թե կառավարության բաժանած ցորենի սերմացուն անորակ էրʽ նախարարը նշեց, որ անկախ փորձագետներից բաղկացած հանձնաժողովը պարզել է, որ ոչ թե սերմացուն է անորակ, այլ տեղումներն են քիչ եղել: Այդ պատճառով էլ որոշ հատվածներում ցորենի ծիլերը կարճ են մնացել: Թե ինչ աջակցություն կցուցաբերվի տուժած գյուղացիներին, նախարարը հստակ չասաց: Ըստ նրա՝ այդ հարցով կզբաղվեն մարզպետարանները:
