«Առաջին կուրսի 600-700 ուսանողի Հայ երիտասարդների կազմակերպությունը կտրամադրի կրթաթոշակ: Խոսքը գնում է այն ուսանողների մասին¸ ովքեր բարձր առաջադիմություն են ցուցաբերել¸ բայց դուրս են մնացել անվճար համակարգից»¸- տեղեկացնում է Հայ երիտասարդական կազմակերպության տնօրեն Կարեն Ավագյանը:
Այս նոր նախագծից օգտվելու համար ուսանողները պետք է դիմեն կազմակերպությանը ներկայացնեն բարձր առաջադիմության¸ հասարակական ակտիվության¸ սոցիալական անապահովության մասին համապատասխան փաստաթղթեր:
Ծրագրի համար տրամադրվել է 60 մլն դրամ¸ իսկ այդ գումարի բաշխումը լավ սովորող ուսանողների մեջ որոշվելու է մրցույթի միջոցով¸ ինչը¸ Ավագյանի խոսքերով¸ անցնելու է թափանցիկ: Նախատեսվում է մարել ընտրված ուսանողների տարեկան ուսման վարձի մինչև 25%-ը:
«Չկա մի ոլորտ¸ որ վերաբերում է երիտասարդությանը ու դուրս է մնացել մեր ուշադրությունից¸ բայց իհարկե¸ ամենաշատը նախաձեռնում ենք սոցիալական ուղղվածություն ունեցող ծրագրեր¸ քանի որ դա է հայ երիտասարդության կարևորագույն խնդիրը»¸-հավելում է Ավագյանը: