Հնդկաստանի հյուսիս-արևելքում տեղացիների ու բանգլադեշցի վերաբնակիչների միջև տեղի ունեցած բախումների հետևանքով սպանվել է նվազագույնը 35 մարդ: Այս մասին հայտնում է «Ալ-Ջազիրան»:
Համաձայն իշխանությունների տեղեկությունների` Բոդոլենդ շրջանի մոտ 170 հազար բնակիչ, խուսափելով բռնություններից, դարձել է փախստական:
Տեղի ոստիկանության ղեկավարը պատմել է, որ շրջանում անկարգությունները ճնշելու համար մտցվել են հավելյալ ռազմականացված ստորաբաժանումներ:
Բոդոլենդի քաղաքներում ու ավաններում մտցվել է պարետային ժամ, տեղանքը վերցվել է ուժեղացված հսկողության տակ:
Բախումների պատճառ է դարձել 4 դեռահասների սպանությունը, որոնք եղել են հինդուսական ու քրիստոնեական համայնքների անդամ: Նրանց սպանության մեջ մեղադրվել էին Բանգլադեշից Հնդկաստան եկած եկվոր մուսուլմանները, ինչից հետո սկսվել էին բախումները էթնիկ հողի վրա:
Շրջանում անկարգությունների հետևանքով փակ են պետական հաստատությունները, ինչպես նաև բազմաթիվ խանութներ, հիվանդանոցներ ու դպրոցներ:
