ՀՀ կրթության զարգացման 2011-2015 թթ. պետական ծրագիրը ներկայացնելով՝ ՀՀ ԿԳ նախարար Արմեն Աշոտյանը նշեց, որ թե՛ Հայաստանում և թե՛ ամբողջ աշխարհում կրթությունը, որպես ծառայություն, կայացած է, քանզի յուրաքանչյուր սպառող կարող է իր հնարավորություններին և կարողություններին համապատասխան կրթություն ստանալ, ինչպես նաև կրթությունն այսօր միջազգայնացվել է:
Աշոտյանի գնահատմամբ, դեռևս խնդիր կա «կրթությունը՝ որպես բարիք» սկզբունքի կայացման առումով, քանզի սոցիալական խնդիրները ոչ բոլորին են թույլ տալիս բարձրագույն կրթություն ստանալու:
Նախարարը նաև նշեց կրթության ևս մեկ կարևոր դերը` «կրթությունը՝ որպես տնտեսական զարգացման հիմք», սակայն, ըստ Աշոտյանի, տնտեսությունը չպետք է դիտարկվի միայն ՀՆԱ և տնտեսական արդյունք ստանալու միջոց, այլ կարևոր է, որպեսզի կրթությունը արժեհամակարգ ձևավորի:
Անդրադառնալով կրթական բնագավառի մարտահրավերներին՝ Աշոտյանը նկատեց, որ Հայաստանում կրթությունը ֆորմալ առումով ֆետիշացված է, այն դիտարկվում է ոչ այնքան գիտելիք ստանալու միջոց, որքան բարձրագույն կրթության վերաբերյալ փաստաթուղթ:
Աշոտյանը նաև անդրադարձավ կրթության բնագավառի մյուս և ամենախոցելի մարտահրավերներին` կոռուպցիոն երևույթներին: «Կոռուպցիոն երևույթները հետևանք են կրթության մոտիվացիայի պակասի, կրթության ֆետիշացման և կառավարման ցածր որակի` դպրոցական օղակներից մինչև նախարարություն»,- նշեց Աշոտյանը:
ԿԳ նախարարը խոսեց նաև կրթության բնագավառի ֆինանսավորման վերաբերյալ և նշեց, որ Հայաստանում այդ բեռը հիմնականում ընկած է պետության և ընտանիքների վրա:
«Կրթությունն այլևս թանկ հաճույք է: Մենք պետք է այնպես անենք, որ բիզնես էլիտան ևս ներգրավվի կրթության ֆինանսավորման ոլորտում, մենք պետք է կարողանանք շարժել բիզնես էլիտայի՝ սեփական շահի երկարաժամկետ գիտակցումը»: