Սուդանի Դարֆուր շրջանի մի քանի զինված խմբավորումներ ցանկություն են հայտնել բանակցել կառավարության հետ: Այս մասին երեքշաբթի օրը հայտարարել է Աֆրիկյան միության և ՄԱԿ-ի միացյալ առաքելության ղեկավար Իբրահիմ Ղամբարին:
Նրա խոսքով` բանակցությունների հիմքում պետք է լինի Կատարի մայրաքաղաք Դոհայում անցյալ տարվա հուլիսի 14-ին ստորագրված խաղաղության մասին փաստաթուղթը:
Ըստ նրա` Սուդանի ղեկավարության վերջերս տեղի ունեցած բանավեճի ընթացքում նշվել է, որ «պայմանները հնարավորություն են ընձեռում վերսկսելու միջնորդական գործընթացը նախնական խորհրդատվությունների և այդ գործընթացին ընդդիմադիր բոլոր շարժումների միավորման միջոցով»:
Նա նշել է նաև, որ փաստաթղթի շատ կետեր դեռևս չեն իրականացվել` չնայած մի քանի ամիս է անցել կատարման վերջնաժամկետից:
Դարֆուրում խաղաղության փաստաթղթի 7-րդ գլխում կողմերը համաձայնության են եկել ներդարֆուրյան գործընթաց իրականացնելու հարցի շուրջ` ամրագրելով, որ այն պետք է իրականացվի Աֆրիկյան միության և ՄԱԿ-ի միացյալ առաքելության համագործակցությամբ:
ՄԱԿ-ի ԱԽ-ի այսօրվա նիստում ներկայացվել է ՄԱԿ-ի գլխավոր քարտուղար Պան Գի Մունի զեկույցը` Աֆրիկյան միության և ՄԱԿ-ի միացյալ առաքելության ժամկետը մեկ տարով երկարաձգելու խնդրանքով:
Մարտի 31-ի դրությամբ Աֆրիկյան միության և ՄԱԿ-ի միացյալ առաքելությունում կա 22445 զինծառայող:
