ՎիվաՍել-ՄՏՍ-ը` «ՄՏՍ» ԲԲԸ դուստր ընկերությունը, և Երևանի «Կենտրոն» վարչական շրջանը հայտարարում են երկկողմ գործակցության մեկնարկի մասին: Այսօր ՎիվաՍել-ՄՏՍ-ի գլխավոր տնօրեն Ռալֆ Յիրիկյանը և «Կենտրոն» վարչական շրջանի ղեկավար Արա Սադոյանը ստորագրել են փոխգործակցության հուշագիր:
Հուշագիրը նախանշում է Հայաստանի հեռահաղորդակցության առաջատար օպերատորի և «Կենտրոն» վարչական շրջանի միջև 2012 թ.-ի ընթացքում համագործակցության շրջանակները: Կողմերը համատեղ ծրագրեր կիրականացնեն մասնավորապես` հանրային կրթության և մշակույթի ոլորտներում:
Համագործակցությունն ուղղված է Երևանի կենտրոնի զարգացմանը: «Կենտրոն» վարչական շրջանը մայրաքաղաքի մշակութային և գործարար կենտրոնն է: Երևանի մշակութային, վարչական և կրթական հիմնարկությունների զգալի մասը գտնվում է հենց այստեղ: Երևանի կենտրոնը Հայաստան այցելողների և հայաստանցիների համար կարևորագույն այն վայրերից է, որտեղ կազմակերպվում են գիտաժողովներ, բացօթյա համերգներ, պետական միջոցառումներ և ցուցահանդեսներ:
Այս համատեքստում` քաղաքի զարգացմանն ուղղված նախագծերին սատարելու պատրաստակամությունը հնարավոր չէ գերագնահատել: Որպես կորպորատիվ սոցիալապես պատասխանատու ընկերություն, ՎիվաՍել-ՄՏՍ-ը չի կարող անմասն մնալ այս ծրագրերից և աջակցության ձեռք է մեկնում «Կենտրոն» վարչական շրջանին:
«Մայրաքաղաքի կենտրոնը գնահատվում է որպես ազգային արժեք` յուրաքանչյուր հայի կողմից: Մենք պետք է հնարավորինս փայփայենք ու հոգ տանենք դրա մասին: Մայրաքաղաքի կենտրոնն այն վայրն է, որից ստացած տպավորությունների հիման վրա, հյուրերը կարծիք են կազմում ամբողջ երկրի մասին. ծանոթանում են մայրաքաղաքի ճարտարապետական համալիրներին, ինչպես նաև կարծիք կազմում` երկրի զարգացման մակարդակի մասին: Մայրաքաղաքի կենտրոնն այն վայրն է, որտեղ կարելի է ծանոթանալ քաղաքի և երկրի պատմությանն և հասարակության զարգացմանը»,-նշել է ՎիվաՍել-ՄՏՍ-ի գլխավոր տնօրենը:
«ՎիվաՍել-ՄՏՍ-ի հոգածությունը մայրաքաղաքի, հատկապես «Կենտրոն» վարչական շրջանի հանդեպ իսկապես գնահատելի է: Վստահ եմ, որ ամենամոտ ապագայում տեսանելի կլինեն մեր փոխգործակցության արդյուքները: Համատեղ իրագործած բազմաթիվ ծրագրերն ու միջոցառումները կնպաստեն այցելուներին մայրաքաղաքի մասին ավելի լիարժեք և տպավորիչ տեղեկատվություն փոխանցելուն: Պատահական չէ ասված՝ «Կենտրոն»-ը Երևանի սիրտն է», – ասել է «Կենտրոն» վարչական շրջանի ղեկավար Արա Սադոյանը:
