Իրաքը համաձայն չէ Սիրիայի նախագահ Բաշար Ասադի հրաժարական տալու և իշխանությունը անցումային կառավարությանը փոխանցելու ԱՊԼ կոչի հետ, երկուշաբթի օրը հաղորդել է Reuters-ը հղում անելով իրաքյան կառավարության պաշտոնական ներկայացուցչին:
ԱՊԼ Սիրիայի հարցով նախարարների հանձնաժողովը կիրակի լույս երկուշաբթի գիշերն արտահերթ նիստ է գումարել Քաթարի մայրաքաղաք Դոխայում, որի արդյունքում նախարարները նախագահ Բաշար Ասադին կոչ են արել որքան հնարավոր է իշխանությունը շուտ փոխանցել անցումային կառավարությանը:
«Իրաքյան պատվիրակությունն իր առարկությունն է հայտնել: Նախարարների հանձնաժողովին բնորոշ չէ ինչ-որ մեկին հեռանալու կոչ անել: Հեռանալու որոշում կարող է ընդունել միայն սիրիական ժողովուրդը, և ոչ ոք չպետք է խառնվի Սիրիայի գործերին»,- գործակալությունը մեջբերում է Իրաքի կառավարության պաշտոնական ներկայացուցիչ Ալի ադ Դաբբագի խոսքերը:
ԱՊԼ նախարարարկան հանձնաժողովի նիստի մասնակիցների կարծիքով՝ Ասադի հեռանալը «կօգնի դադարեցնել արյունահեղությունը»: Միաժամանակ հայտարարության մեջ նշված է, որ «ԱՊԼ-ն կօգնի Ասադին և կապահովի նրա ընտանիքի անվտանգությունը»:
Ինչպես նշում է գործակալությունը, Իրաքը, որտեղ իշխանությունը հիմականում շիաներինն է, Սիրիայի ճգնաժամի հանդեպ համեմատաբար մեղմ դիրքորոշում ունի, քան Պարսից ծոցի երկրները, որտեղ հիմնականում սունիտներ են:
