Apple ընկերությունը մտադիր է հարավկորեական Samsung ընկերությունից գնել հեղուկբյուրեղյա էկրաններ, NAND տիպի ֆլեշ-հիշողություններ և բջջային միկրոպրոցեսորներ` ընդհանուր առմամբ 7 մլրդ 800 մլն դոլարի: Այս մասին տեղեկացնում է Vesti.ru-ն` հղում կատարելով Korea Economic Daily թերթին:
Այս բաղադրիչները, ամենայն հավանականությամբ, պետք է օգտագործվեն հաջորդ սերնդի iPhone սմարթֆոնի և iPad պլանշետային համակարգչի համար: Թերթը նշում է, որ եթե պայմանագիրը ստորագրվի, ապա «խնձորային» ընկերությունը կդառնա Samsung-ի ամենախոշոր հաճախորդը: Այս դեպքում Apple-ը հանդես է գալու և՛ որպես Samsung-ի մրցակից, և՛ գործընկեր, որը iPhone և iPad-ի հետ մրցակցում է Galaxy Android սպարթֆոնով և Galaxy Tab պլանշետով:
The Korea Times-ն, իր հերթին, գրում է, որ Apple-ը մտադիր է iPad 2-ի վրա տեղադրել Samsung Super PLS էկրանը, որը հատուկ մշակված է սմարթֆոնների և պլանշետների համար: Այն, ամենայն հավանականությամբ, կփոխարինի IPS-ին (In-Plane Switching), որը տեղադրված է առաջին iPad-ի վրա:
Ավելի վաղ լուրեր էին հայտնվում, որ Apple-ը պլանավորում է iPad 2-ի վրա տեղադրել Retina Display:
Այժմ մասնագետների մեծ մասն, այնուամենայնիվ, հանգել է այն եզրակացության, որ Կուպերտինոյում տեղակայված ընկերությունը հավատարիմ կմնա իր պիկսելների 1024×768 չափին, քանի որ մեծ քանակությամբ կետերի առկայությունը սպառնում է շատ արագ լիցքաթափել մարտկոցը:
