«Սարդարապատ» շարժման նախաձեռնող խումբը հանդես է եկել հայտարարությամբ:
Հայաստանյան քրեաօլիգարխիկ վարչախմբի հլու կամակատար և պատժիչ մարմին դատարանի կողմից ՀԱԿ-ի երիտասարդ ակտիվիստների նկատմամբ կայացրած անմարդկային ու ապօրինի դատավճիռը համակարգի ինքնավստահության և ինքնատիրապետման բացակայության ապացույցն է:
Ակտիվ երիտասարդ սերնդի առանցքի շուրջ ձևավորվող քաղաքացիական հանրության մեջ տեսնելով իր գոյությանն սպառնացող ամենալուրջ վտանգ, վարչախումբը ընտրում է գոյատևման վերջին միջոց բռնությունը և հարձակման է անցնում: Քրեական օլիգարխիայի ներկայացուցիչ Ռուբեն Հայրապետյանի թիկնազորի կողմից ՀՀ զինված ուժերի սպա, զինվորական բժիշկ Վահե Ավետյանին առանձնակի դաժանությամբ սպանելը և երիտասարդ ակտիվիստների կողմից ոստիկանական ապօրինի բռնությանը ինքնապաշտպանության նպատակով հակադարձելը մոտավորապես նույն ծանրության հանցագործություն համարելու միջոցով(առաջիններին նախատեսելով 5-ից 10 տարի արգելափակում, իսկ երիտասարդներին փաստացի դատապարտելով մինչև 6 տարի բանտարկության), վարչախումբը բացահայտ մարտահրավեր է նետում հանրությանը:
Անթաքույց լկտիությամբ ոտնահարելով իրավունքն ու օրինականությունը, վարչախումբը փորձում է քրեական պատժի միջոցով հաշվեհարդար տեսնել ու սպառնալիքով ահաբեկել ու լռեցնել քաղաքացիական ակտիվության կորիզը կազմող երիտասարդությանը:
«Սարդարապատ» շարժման նախաձեռնող խումբը Հայրենիքի և սերունդների ապագայի համար պատասխանատվություն զգացող քաղաքացիական ակտիվիստներին, առաջին հերթին` երիտասարդությանը կոչ է անում ոչ մի պարագայում չընկրկել պետական իրավապահ համակարգը ժողովրդի նկատմամբ որպես ահաբեկման գործիք կիրառող հանցավոր վարչախմբի սպառնալիքների առջև, այլ համախմբվել ու միասնաբար պայքարել երիտասարդ ակտիվիստներին օր առաջ ազատության մեջ տեսնելու նպատակի համար: «Սարդարապատ» շարժման նախաձեռնող խումբը իր պատրաստակամությունն է հայտնում բոլոր հնարավոր ձևերով ու միջոցներով մասնակցելու և աջակցելու այդ համախմբմանն ու պայքարին:
Իր հոգևարքն արդեն իսկ զգացող քրեաօլիգարխիկ համակարգը գոյատևման տենդի մեջ է ընկել և հերթական անխուսափելի սխալն է կատարում, քանի որ այլևս գործ ունի այնպիսի քաղաքացիական հասարակության հետ որին չես վախեցնի ձերբակալություններով այլ ընդհակառակը կամրապնդես պայքարի վճռականությունը, ուստի մեր պարտքն է լիարժեք կերպով օգտագործել այս հնարավորությունը և հանիրավի դատապարտված երիտասարդների ազատագրմամբ ևս մեկ քայլ կատարել Հայոց պետականության նորոգման ու Հայրենիքի վերածննդի գործում:
