Այսօր «Ժառանգություն» խորհրդարանական ընդդիմադիր խմբակցությունում հյուրընկալվեց Ռուսաստանի Դաշնության արտաքին գործերի նախարարի տեղակալ-պետքարտուղար Գրիգորի Կարասինի գլխավորած պատվիրակությունը:
«Ժառանգությունից» հանդիպմանը մասնակցեցին խմբակցության ղեկավար Ստյոպա Սաֆարյանը, քարտուղար Լարիսա Ալավերդյանը և պատգամավոր Զարուհի Փոստանջյանը: Սաֆարյանը հյուրերին ներկայացրեց «Ժառանգություն» կուսակցության հիմնական ծրագրային դրույթները ներքին և արտաքին քաղքականության կարևորագույն հարցերում, ինչպես նաև` կուսակցության գործունեությունը խորհրդարանում և դրանից դուրս:
Հանդիպման մասնակիցները քննարկեցին և տեսակետներ հայտնեցին երկու երկրների համագործակցության ու հետաքրքրությունների դաշտում գտնվող մի շարք խնդիրների վերաբերյալ. Ռուսաստան-Հայաստան ռազմավարական հարաբերություններ, Ադրբեջանի կողմից տարածաշրջանում հարուցվող հարցեր, որոնք դեռևս անհիմն անվանվում են «Հայ-ադրբեջանական բախում» կամ «Արցախի հարց», տարածաշրջանի լարվածության ու ռազմականացման հարցեր, խորհրդարանական միջազգային կազմակերպություններում երկու երկրների պատվիրակությունների համագործակցության անհրաժեշտությունը:
Բարձրացվեցին նաև տնտեսական ոլորտին վերաբերող հարցեր, մասնավորապես, ներկայացվեց, որ հայ-ռուսական համատեղ պետական ձեռնարկության կողմից, առանց հասարակական կարծիքը հաշվի առնելու, իրականացվում են ուրանի հանքերի ուսումնասիրությանն ուղղված աշխատանքներ, որոնք բացասաբար են անդրադառնում շրջակա միջավայրի վրա: Նշվեց նաև, որ Ռուսաստանի կողմից սեփականություն ձեռք բերելու քաղաքականությունը կրում է գրեթե համատարած բնույթ, այնինչ ներդրումային քաղաքականությունը դեռևս գտնվում է անբավարար մակարդակի վրա:
Հանդիպման վերջում Գրիգորի Կարասինն իր եզրափակիչ խոսքում նշեց, որ «Ժառանգություն» խմբակցության պատգամավորների հետ հանդիպումը ցույց տվեց, որ իրապես անհարաժեշտություն կա ընդլայնել ՀՀ Ազգային ժողովի և Ռուսաստանի Դաշնության Պետդումայի համագործակցությունն ինչպես ռազմավարական, այնպես էլ` այլ ոլորտներին վերաբերող արդիական խնդիրների շուրջ: