Մեդիամագնատ Ռուպերտ Մերդոկը հայտարարել է News International-ի տնօրենի պաշտոնը լքելու մասին: News International-ը նրա News Corporation գլոբալ մեդիա կորպորացիայի բրիտանական մասնաճյուղն է: Այս մասին հաղորդում է BBC-ն:
Նամակում, որը նա հղել է ընկերության աշխատակիցներին, որպես պաշտոնաթողության պատճառ նշվել է կորպորացիայի վերակառուցումը:
Ծրագրվում է News Corporation-ը բաժանել երկու մասի` ընկերության մի մասը կզբաղվի թերթերով ու գրքերի հրատարակությամբ, իսկ մյուսը` հեռուստատեսությամբ և ֆիլմարտադրությամբ:
81-ամյա Մերդոկը, ամենայն հավանականությամբ, կգլխավորի հեռուստատեսային ուղղությունը: Նշենք, որ News International-ը լույս է ընծայում բրիտանական Times, Sun և Sunday Times թերթերը:
Itar-Tass-ի փոխանցմամբ` Մերդոկը լքել է նաև իր մեդիակայսրության մեջ մտնող մի քանի ամերիկյան ընկերությունների տնօրենների խորհուրդը:
Բիզնես-մեդիա ոլորտի փորձագետ Քլեր Էնդերսի խոսքով` Մերդոկի այս քայլերը վկայում են Մեծ Բրիտանիայում հայր և որդի Ռուպերտ և Ջեյմս Մերդոկների դիրքերի թուլացման մասին, ինչի պատճառը գաղտնալսումների սկանդալն էր: