Գյումրիում ՀՀԿ-ի մարզային խորհրդի նորընտիր ղեկավարի պաշտոնում այսօր ընտրվել է Շիրակի մարզպետարանի կրթության վարչության պետ Սահակ Մինասյանը, ում պաշտոնավարման տարիներին մարզի դպրոցներում խայտառակ չարաշահումներ են գրանցվել:
Մասնավորապես, նրա պաշտոնավարման տարիներին մարզի մի շարք դպրոցներում աշակերտների հավելագրման դեպքեր են գրանցվել, որպեսզի պետբյուջեից դպրոցներն ավելի ֆինանսավորում ստանան: Հայտնի է, որ Հայաստանում դպրոցները ֆինանսավորվորվում են աշակերտների թվով:
Եվ ահա Շիրակի մարզի մի շարք դպրոցներ որոշել էին հարստացման հեշտ ճանապարհ գտնել և աշակերտների կեղծ տվյալներ էին ներկայացրել՝ պետբյուջեից հավելյալ ֆինանսավորում ստանալու համար: Դժվար է պատկերացնել, որ մարզի կրթության վարչության պետը տեղյակ չի եղել այդ չարաշահուներին, որ տնօրենները մարզպետարանի աչքից հեռու ինքնագործունեություն են ծավալել: Առավել ևս դժվար է պատկերացնել, որ անմիջապես մարզի կրթության վարչության պետի հանձնարարականով չեն կատարվել այդ չարաշահումները: Ժամանակին մեծ աղմուկ հանած այս դեպքերով քրեական գործ է հարուցվել, իսկ մեղադրյալներն ընդամենը երեք նախկին երեք տնօրեններ են: Գյումրիի «Ասպարեզ» լրագրողների ակումբի նախագահ Լևոն Բարսեղյանը «Առաջին լրատվական»-ի հետ զրույցում նշեց, որ այդ դեպքերի առթիվ Սահակ Մինասյանի նկատմամբ քրեական գործ չի հարուցվել: Ավելին, Մինասյանը պաշտոնի բարձրացում ունեցավ՝ նշանակվելով ՀՀԿ-ի մարզային խորհրդի ղեկավար:
Հիշեցնենք, որ Գյումրիի քաղաքապետ Վարդան Ղուկասյանը ՀՀԿ-ի մարզային խորհրդի ղեկավարի պաշտոնից հրաժարական է ներկայացրել: Ըստ Գյումրիում շրջանառվող տեղեկությունների՝ ՀՀԿ վերնախավը և անձամբ Սերժ Սարգսյանը դժգոհ են եղել Վարդան Ղուկասյանի վարքից: Ըստ Լևոն Բարսեղյանի՝ իշխանությունները կարծում են, որ խորհրդարանական ընտրությունների ժամանակ ՀՀԿ-ի օգտին ստացված քիչ թվով ձայների պատճառը հենց Վարդան Ղուկասյանն է եղել: Հիշեցնենք, որ խորհրդարանական ընտրություններում ՀՀԿ թեկնածուն Գյումրիում հավաքեց 14.5 հազար ձայն՝ պարտության մատնվելով ԲՀԿ թեկնածուին, ով հավաքել էր 26 հազար ձայն: «Բայց իրենք չեն հասկանում, որ ՀՀԿ կրած խայտառակ պարտության մեղավորը իշխանությունների վարած քաղաքականությունն է: Տարիներ շարունակ իշխանությունները չեն տեսել կամ չեն ուզել լուծել գյումրեցիների խնդիրները: Արդյունքում Գյումրիում անօթևան ընտանիքների թիվը կազմում է ավելի քան 6000, իսկ աղքատության ցուցանիշը՝ 40 տոկոս»,- ասաց նա: Լևոն Բարսեղյանի խոսքով՝ Վարդան Ղուկասյանի մեղքն այս գործում այն է եղել, որ նա հաշվի չի առել գյումրեցիների բնավորության առանձնահատկություններն ու մեծ-մեծ խոստումներ է տվել իշխանություններին: «Հիմա էլ որոշել են պատժել, կարգի հրավիրել Վարդան Ղուկասյանին»,- նշեց նա:
