ԱՄՆ նախագահ Բարաք Օբաման հունիսին նախընտրական արշավի վրա կրկնակի է ծախսել, քան Ռոմնին: Այս մասին է վկայում Դաշնային ընտրական հանձնաժողովի հրապարակած զեկույցը:
Օբաման և նրա դեմոկրատական ազգային կոմիտեն հունիս ամսին ծախսել են 70.8 միլիոն դոլար, այդ թվում՝ 38 միլիոն դոլար հեռուստատեսային գովազդի համար: Օբամայի քարոզարշավի հիմնական թիրախը մրցակցի և Bain Capital-ի հետ նրա կապերն են: Այս մասին տեղեկացնում է The New York Times-ը:
Օբամայի հիմնական մրցակից Միթ Ռոմնին և Հանրապետական ազգային կոմիտեն հունիսին ծախսել են 38.8 միլիոն դոլար, այդ թվում` 11 միլիոն` հեռուստագովազդի համար: Սա կրկնակի գերազանցում է Ռոմնիի մայիսի ծախսերը, սակայն Օբաման իր ծախսերով շարունակում է առաջատար մնալ: Օբաման նաև ակտիվ օնլայն արշավ է իրականացնում՝ հունիսին ինտերնետ գովազդի վրա ծախսելով 4.4 միլիոն դոլար:
Ընտրական գործընթացի որոշակի ֆինանսական միջոցներ թեկնածուների կողմից դեռևս չեն կարող ծախսվել: Նրանք այդ միջոցները ծախսելու հնարավորություն կունենան միայն ամառվա վերջին, երբ կայանան երկու կուսակցությունների համագումարները:
Թեկնածուները ամուր հենված են քաղաքական դոնորների վրա: Հայտնի է, որ Ռոմնիի հովանավորները շատ-շատ են: Ռոմնին հրաժարվում է անդրադառնալ այդ հարցին: USA Today-ի տվյալներով՝ նա 1200 հովանավոր ունի, որոնցից մի քանի հարյուրը ֆինանսական ինդուստրիայի գործադիրներ են:
Firstnews-ը հաղորդում է, որ մրցապայքարի մեկնարկից մինչ օրս առաջին անգամ Ռոմնին ընտրողների աջակցության ծավալով առաջ է անցել Օբամայից: Ռոմնիին իր աջակցությունն է հայտնել ընտրողների 47, իսկ Օբամային՝ 46 տոկոսը:
