«Յաշիկների շքերթ» Երևանում. ըստ դավիթաշենցիների՝ «քավորը» «Ծաղիկ Ռուբոն» է (լուսանկարներ)

Այսօր՝ հուլիսի 20-ին, ֆոտոլրագրող Գագիկ Շամշյանի տեսախցիկն արձանագրել է «Մերսեդես Ջի» («Յաշիկ») մակնիշի նույնանման մեքենաների մի ամբողջ շարք Դավիթաշենի կամրջից դեպի Տիգրան Պետրոսյան փողոց տանող հատվածում, որոնք կայանված են եղել նշված վայրում մի քանի շարքով:

Ֆոտոլրագրողը News.armeniatv.com-ին հայտնել է, որ մոտ 20 րոպե կայանված մնալուց հետո՝ «յաշիկավորները» միմյանց ուղեկցելով շարժվել են դեպի Կոմիտաս փողոցի ուղղությամբ:

Գ. Շամշյանը հայտնել է, որ վարորդներից և ոչ ոք չէր կապել ամրագոտիները, իսկ հավաքված քաղաքացիները տեսնելով, որ Գ. Շամշյանը լուսանկարահանում է, կեսկատակ-կեսլուրջ ասել են. «էս սաղ յաշիկները հավաքվել են «Ծաղիկ Ռուբոյի» (ԱԺ ԲՀԿ-ական պատգամավոր Ռուբեն Գևորգյան) մոտ: Հավաքվածները նույնիսկ կատակել են. «Սենց որ գնա, «Ծաղիկ Ռուբոն» էս մեքենաների դեմը պսակներ ա դնելու»:

Գ. Շամշյանը իր փորձից ելնելով՝ կարծում է, որ գոնե այս անգամ Ճանապարհային ոստիկանությունը համապատասխան միջոցներ կձեռնարկի և այս «երկաթյա արկղերի» վարորդները կենթարկվեն վարչական պատասխանատվության:

Լուսանկարները՝ Գագիկ Շամշյանի