Այսօր «Հայելի» ակումբի հյուրն էր կրթության և գիտության փոխնախարար Մանուկ Մկրտչյանը: Փոխնախարարը հիմնականում անդրադարձավ փետրվարի 18-ին 114 դպրոցում առաջին անգամ կայանալիք տնօրենների հավաստագրման քննությանը, որին մասնակցելու են վերապատրաստում անցած մանկավարժները:
Քննությունները անց են կացվելու երկու փուլով. առաջին փուլով մանկավարժը հանձնելու է թեստ, որն անցնելու է երկրորդ քննական փուլ: Երկրորդ փուլը բանավոր քննությունն է, որի ընթացքում տրվելու է հինգ հարց:
Քննական հանձնաժողովի անդամներին քննությունից մեկ օր առաջ ընտրելու է համակարգիչը` նախօրոք կազմված ցուցակից: Փոխնախարարի խոսքերով, հավաստագրերի քննության կազմակերպումը ԿԳՆ կողմից ենթադրում է, որ դպրոցի տնօրենների որակի համար պատասխանատվությունը նախարարությունը վերցնում է իր վրա:
Փոխնախարարը լրատվամիջոցներին և հասարակական կազմակերպության անդամներին հրավիրեց քննությունը դիտարկելու: Այդ քննությունը նախատեսված է օրենքով և անց է կացվելու տարին երկու անգամ:
Այս տարի նախատեսված է երեք քննություն, և վերապատրաստում անցած տնօրենները իրենք են որոշելու՝ երբ մասնակցեն քննությանը: Ներկայումս գործող ոչ բոլոր տնօրեններն են անցել վերապատրաստում:
Մանուկ Մկրտչյանը անդրադարձավ նաև դպրոցական դասագրքերի որակի հարցին՝ ասելով, որ նախատեսվում է գոյություն ունեցող դասագրքերը փոխարինել նորերով՝15-25 տոկոսով բեռնափոխելով դասագրքերի ծավալը:
Պետական բուհերի ռեկտորների քննության հետ կապված փոխնախարարը նշեց, որ մարտի 6-ին լրանալու է մի շարք համալսարանների ռեկտորների պաշտոնավարման ժամկետը, սակայն նոր ընտրության օր դեռևս չի նշանակվել: