Որքան էլ միջազգային կառույցները հայտարարեն, որ չեն ճանաչում ԼՂՀ ընտրությունները, միևնույն է նրանք ուշի ուշով հետևում են դրանց ընթացքին: Հետևաբար Արցախում ժողովրդավար ընտրությունների կայացումը խիստ կարևոր է: «Առաջին լրատվական»-ի հետ զրույցում նման տեսակետ հայտնեց ՌԱՀՀԿ փորձագետ Էդգար Վարդանյանը:
«Ընտրությունների արդյունքները չճանաչելն ամենևին էլ չի նշանակում, որ միջազգային հանրությունը չի հետևում ժողովրդավարության հետ անմիջական կապ ունեցող ԼՂՀ քաղաքական գործընթացներին: Քաղաքական որոշումներ կայացնելիս նույն այդ միջազգային հանրությունը հիմնվում է ընտրությունների մասին այս կամ այն գնահատականը հնչեցրած ոչ կառավարական հեղինակավոր կազմակերպությունների գնահատականների վրա»,- ասաց նա:
Էդգար Վարդանյանի խոսքով՝ ԼՂՀ-ում ժողովրդավարական ընտրությունների կայացումը ոչ միայն կարևոր, այլև խիստ գնահատելի երևույթ է: «Եթե կա առաջխաղացում, դա արդեն իսկ գովելի է, իսկ եթե ժողովրդավարության առումով հետընթաց է գրանցվել, միջազգային հանրությունը դա շատ մտահոգիչ է համարում և հաշվի առնում տվյալ երկրի վերաբերյալ քաղաքական որոշումներ կայացնելիս»:
Հարցին՝ որքանո՞վ է Արցախն ավելի ժողովրդավար, քան հարևան Ադրբեջանը, փորձագետը պատասխանեց. «ԼՂՀ-ն, ընդհանուր առմամբ, ժողովրդավար չէ: Պարզապես առանձին տարրերի առումով Արցախում ժողովրդավարությունն ավելի կայացած է»:
