Գլխավոր խնդիրը, որ այսօր գտնվում է ԵԱՀԿ Մինսկի խմբի համանախագահների ուշադրության կենտրոնում, ղարաբաղաադրբեջանական շփման գծից դիպուկահարների դուրսբերման հարցն է, որին ոչ մի կեպ չի համաձայնում Ադրբեջանը: Այսօր տեղի ունեցած մամուլի ասուլիսի ժամանակ այս մասին ասաց քաղաքագետ Սերգեյ Մինասյանը:
«Ադրբեջանի՝ այս հարցում ցուցաբերած համառությունը զայրացնում է միջազգային հանրությանը»,- նկատեց նա՝ միաժամանակ հավելելով, որ դիպուկահարներին սահմանից դուրս չբերելը Ադրբեջանի ձեռքում եղած վերջին զենքն է:
Անդրադառանալով ԼՂՀ-ում այսօր տեղի ունեցող նախագահական ընտրություններին՝ Սերգեյ Մինասյանը նկատեց, որ ղարաբաղյան ազատ ու թափանցիկ ընտրությունները բավական ուժեղ փաստարկ են միջազգային հանրության համար: «Մանավանդ, որ ի տարբերություն հարևան Ադրբեջանի՝ Արցախում իշխանությունը հորից որդուն չի անցնում: Միաժամանակ, ընտրությունների մասին միջազգային որոշ կառույցների կողմից քննադատական գնահատականներ հնչեցնելը ոչինչ չի նշանակում, քանի որ նույն այդ կառույցները շարունակում են համագործակցել Արցախի ընտրված իշխանությունների հետ: Այլ կերպ ասած՝ այդ հայտարարությունները չեն վնասում ԼՂՀ շահերին»,- նկատեց նա:
Քաղաքագետը նաև համոզմունք հայտնեց, որ Ադրբեջանը վաղուց հաշտվել է Ստեփանակերտի օդանավակայանի գործարկման մտքի հետ: