Փետրվարի 13-ին Գերմանիայի Դաշնային Հանրապետություն ժամանեց ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանի գլխավորած պատվիրակությունը:
Փետրվարի 14-ին ՀՀ ոստիկանության պետ Ալիկ Սարգսյանը և ԳԴՀ ներքին գործերի նախարարության խորհրդարանական պետքարտուղար դոկտոր Օլե Շրյոդերը ստորագրեցին «Հայաստանի Հանրապետության ոստիկանության և Գերմանիայի Դաշնային Հանրապետության ներքին գործերի նախարարության միջև համատեղ գործողությունների հռչակագիրը»:
Համագործակցությունն ընդգրկելու է կազմակերպված հանցավորության, թմրամիջոցների և հոգեներգործուն նյութերի ապօրինի շրջանառության, անօրինական միգրացիայի և մարդկանց առևտրի դեմ պայքարի ոլորտները:
Հռչակագիրը նախատեսում է նաև ոստիկանական կադրերի վերապատրաստում, փորձագետների փոխանակում, ինչպես և փորձի փոխանակում` հատկապես ոստիկանների նախնական պատրաստման և որակավորման բարձրացման, ինչպես և համազորային մարտավարության բնագավառում:
Հռչակագրի ստորագրմանը նախորդել էր ՀՀ ոստիկանության և ԳԴՀ ՆԳՆ պատվիրակությունների աշխատանքային հանդիպումը, որի ընթացքում քննարկվեցին փաստաթղթի արդյունավետ իրականացման հնարավորություններն ու համագործակցության հեռանկարները, իսկ ստորագրման արարողությունից հետո ի պատիվ ՀՀ ոստիկանության պետ Ալիկ Սարգսյանի տրվեց ճաշ` ԳԴՀ ՆԳՆ խորհրդարանական պետքարտուղար դոկտոր Օլե Շրյոդերի անունից:
Օրվա երկրորդ կեսին ՀՀ ոստիկանության պետ Ալիկ Սարգսյանի գլխավորած պատվիրակությունն այցելեց ԳԴՀ ՆԳՆ օպերատիվ կառավարման կենտրոն, ապա` Բեռլինի թիվ 34 ոստիկանական բաժանմունք: Այցելությունների ընթացքում պատվիրակության անդամները ծանոթացան այդ կառույցների աշխատանքին, ինչպես և քննարկվեցին հետագա համագործակցության և փորձի փոխանակման հնարավորությունները: