Բրիտանական The Daily Mail պարբերականն անդրադարձել է մարդկային մարմնի մասերի առևտրում մահացածների մաշկի, ոսկորների և հյուսվածքների վաճառքի թեմային:
Հետաքննող լրագրողների միջազգային կոնսորցիումը բացահայտել է, որ հյուսվածքներն ու ոսկորներն օգտագործվում են վնասված մաշկի պատվաստումների, ատամնային իմպլանտների և քաղցկեղի բուժման նպատակով: Դրանք մահացածներից վերցվում են առանց նրանց հարազատների համաձանության:
Փետրվարի 24-ին Ուկրաինայում աղմկահարույց բացահայտում արվեց. երկրի փողոցներում իշխանության ներկայացուցիչները նկատել էին սպիտակ միկրոավտոբուս, որի սառնարաններում եղել էին մարդկային ոսկորներ և հյուսվածքներ: Անվտանգության ծառայությունները բացահայտեցին, որ դա ոչ թե սերիական մարդասպանի ձեռքի գործն է, այլ բժշկական և ստոմատոլոգիական նյութերի բաղադրիչներ ապահովող միջազգային խողովակ:
Հետաքննող լրագրողները պարզել էին, որ ըստ առգրավված փաստաթղթերի՝ մահացած ուկրաինացիների մնացորդները պետք է ուղարկվեին Գերմանիայում տեղակայված մի գործարան, որը ամերիկյան բժշկական արտադրանքների RTI Biologics ընկերության դուստր ձեռնարկությունն է:
ԱՄՆ-ը միայնակ կարողանում է ապահովել մահացած մարդկանց հյուսվածքներից պատրաստվող՝ տարեկան 2 միլիոն բժշկական ապրանքների պահանջարկը, որը վերջին 10 տարում կրկնապատկվել է:
Կոնսորցիումը 11 երկրներում իրականացրած հետազոտության արդյունքում պարզել է, որ ոչ բոլոր իշխանություններն են իրազեկված փոխպատվաստվող հյուսվածքների և դրանց ձեռք բերման օրինականության մասին: Շատ բժիշկներ անգամ հարկ չեն համարում հիվանդին տեղյակ պահել, թե ինչ ծագում ունեն իմպլանտը, կրծքերի մեծացման կամ առնանդամի վիրահատության համար նախատեսված շատ հյուսվածքներ:
Շուկայում հյուսվածքների գները խիստ տարբերվում են: Մեկ դիակից հնարավոր է 80-200 հազար դոլար եկամուտ ստանալ:
