Լավատեղյակ աղբյուրների վկայությամբ, չորեքշաբթի կոալիցիոն երեք ուժերը ստորագրելու են կոալիցիոն հուշագրի թարմացված տարբերակը:
Ըստ մեր աղբյուրների՝ Սերժ Սարգսյանի եւ Գագիկ Ծառուկյանի միջեւ պայմանավորվածություն է ձեռք բերվել, որ ԲՀԿ-ն իր համագումարի ժամանակ կշրջանցի այդ թեման, բայց ահա դրանից հետո կստորագրի հուշագրի թարմացված տարբերակը:
Մեր աղբյուրների պնդմամբ, այնտեղ կոալիցիոն կուսակցությունները հայտարարելու են հետագա համագործակցության մասին ու ամրագրելու, որ 2013թ. ընտրություններում հանդես են գալու միասնական թեկնածուով:
Ըստ մեր աղբյուրների՝ թեկնածուի անունը, սակայն, հուշագրում չի նշվելու. սա եղել է առավելագույն զիջումը, որ կարողացել է ԲՀԿ-ն կորզել ՀՀԿ-ից:
«Բայց դե, ակնհայտ է, որ խոսքը Սերժ Սարգսյանի մասին է»,- նշեց մեր աղբյուրը:
Ի դեպ, ուշագրավն այն է, որ ՀՀԿ կայքում որեւէ տող չկար ԲՀԿ համագումարին Սերժ Սարգսյանի մասնակցության մասին, մինչդեռ, կոալիցիոն գործընկերությունը ենթադրում էր, որ պետք է նշվի այդ փաստը:
Միայն նախագահականի կայքում էր մեկ նախադասությամբ գրված, որ Սերժ Սարգսյանը ներկա է գտնվել ԲՀԿ համագումարին:
Թեեւ ավելին գրելու հարկ էլ չկար, քանի որ Ս. Սարգսյանը որեւէ բառ չի խոսել այդ մասին:
Նկատենք, որ ԲՀԿ համագումարին եթե ՀՀԿ-ն ներկա էր առաջին դեմքով, ապա կոալիցիոն մյուս գործընկերը՝ ՕԵԿ-ը ուղարկել էր սովորական մի պատգամավորի՝ Խաչիկ Հարությունյանին. ո՛չ ՕԵԿ նախագահը, ո՛չ ԱԺ ՕԵԿ խմբակցության ղեկավարը հարկ չէին համարել գնալու ԲՀԿ համագումարին: