Սիրիացի ապստամբները հուլիսի 17-ի երեկոյան հայտարարել են, որ իրենց հաջողվել է խփել Դամասկոսի արևելքում` Կաբուն թաղամասում պտտվող ռազմական ուղղաթիռ: Այս մասին հաղորդել է Reuters-ը:
«Ուղղաթռիները Դամասկոսի վրայով թռչում են ցածր բարձրության վրա, այդ պատճառով դրանց շատ հեշտ է խփել մեր մոտ առկա հակաօդային պաշտպանության միջոցներով»,- գործակալությանը հայտնել է ապստամբների ղեկավարներից մեկը:
The Guardian բրիտանական թերթի փոխանցմամբ` հենց Կաբունի շրջանում այժմ թեժ մարտեր են ընթանում զինված ընդդիմադիրների և կառավարական ուժերի միջև: Թաղամասերը գնդակոծման են ենթարկվում տանկերի, ուղղաթիռների կողմից:
Հիշեցնենք, որ ավելի վաղ Agence france-Presse-ը փոխանցել էր, որ Սիրիայի կառավարությունը հուլիսի 17-ի առավոտյան հարվածային ուղղաթիռներ էր կիրառել Կաբուն թաղամասում` ապստամբության օջախները ճնշելու համար: Այդ տվյալների համաձայն՝ ուղղաթիռները պտտվել են բնակելի թաղամասերի վերևում՝ գնդակոծելով ապստամբների դիրքերը:
Դամասկոսում դաժան մարտերը շարունակվում են արդեն երրորդ օրը: Ականատեսների խոսքերով՝ սրանք Սիրիայի համակամարտության 16 ամիսների ընթացքում ամենադաժան մարտերն են մայրաքաղաքում:
