«Զվարթնոց» մաքսատան առջև խնդիր է դրված ուղևորներին մատուցել միջազգային չափանիշներին համահունչ բարձրակարգ ծառայություն, հետևաբար սպասարկման որակի բարելավմանն ու տեխնիկական վերազինմանն ուղղված միջոցառումներն այստեղ մշտական բնույթ են կրում: Պայմանավորված օդանավակայանի ուղևորային համալիրում ուղեբեռի ստացման համար նախատեսված ևս 2 ժապավենների համալրմամբ, ըստ ՊԵԿ «Զվարթնոց» մաքսատան պետ Սամվել Սաֆարյանի, մաքսատան գործելաոճում ևս փոփոխություններ են արվել` հօգուտ ուղևորների. «Տեխնիկական վերազինման արդյունքում այժմ ավելի քան 50 տոկոսով արագացվել է ուղևորների սպասարկման գործընթացը, իսկ շնորհիվ ավելացած ժապավենների, այժմ մաքսավորները միանգամից 6 կետից են հետևում գործընթացին, ընդ որում, ուղևորից աննկատ` տեղադրված հատուկ տեխնիկայի` «Ռապիսկան» տեսակի զննող ներսադիտակների և սարքավորումների միջոցով»:
Սամվել Սաֆարյանի խոսքերով մաքսային ձևակերպումներն արագ կատարելու համար մաքսատանն օգտագործվող տեխնիկան պարբերաբար թարմացվում է ժամանակակից տեխնոլոգիաներով. «Վերջերս ձեռք են բերվել ևս 7 համակարգիչներ, ընդլայնվել են «կանաչ», «կարմիր» ուղիները: Մաքսատանը նաև բանկային մասնաճյուղ է բացվել, ինչը հնարավորություն է տալիս սահմանված չափը գերազանցող ուղեբեռի դեպքում, ի տարբերություն նախկին կարգի, ձևակերպումները նույն պահին իրականացնել` առանց մաքսատնից դուրս գալու»:
ՊԵԿ տեղեկատվության և հասարակայնության հետ կապերի բաժնից
Ուղևորային սրահում ներդրված մաքսային ձևակերպումներին առնչվող նորամուծությունները գործում են նաև ուղևորների բարձրակարգ սպասարկման սրահում: «Ուղևորների հետ շփման ընթացքում մաքսավորը պետք է դրսևորի բացառապես բարեհամբույր և բարեկիրթ վերաբերմունք: Այդ խնդիրը գտնվում է իմ անմիջական ու հետևողական հսկողության ներքո: Չէ որ Հայաստան եկող յուրաքանչյուր այցելու կամ զբոսաշրջիկ առաջին տպավորությունը հենց այստեղից է ստանում»,- վստահեցրել է մաքսատան պետ Սամվել Սաֆարյանը:
Մաքսատան պետի տեղակալ Արմեն Պողոսյանի տեղեկացմամբ, օդանավակայանում տեսանելի վայրում տեղադրված մոնիթորներից` պարբերաբար հեռարձակվող տեսահոլովակի միջոցով ուղևորներին նաև տեղեկացվում է, թե ինչպես և որտեղ պետք է հայտարարագրվի բեռը:
