Բամբակի գները միջազգային շուկաներում հասել են ռեկորդային բարձր մակարդակի` մոտենալով 2 դոլարին 1 ֆունտի համար: InterContinental Exchange-ում ուրբաթ օրը մարտյան ֆյուչերսների գինը հասել է 1,9445 դոլարի 1 ֆունտի դիմաց: Մեծ պահանջարկը, հատկապես Չինաստանի կողմից, ինչպես նաև մատակարարման ոչ բավարար մակարդակը նպաստեցին նրան, որ տարվա սկզբից բամբակի գները աճեն 3.1%-ով: Իսկ վերջին 12 ամիսներին, ինչպես հաղորդում է “Интерфакс”-ը, բամբակը թանկացել է ավելի քան 2 անգամ:
Հագուստի տարբեր արտադրողներ, ներառյալ այնպիսի ընկերություններ, ինչպիսին է Hanesbrands Inc.-ը, Jon es Group Inc.-ը և Polo Ralph Lauren Corp.-ը, ստիպված են այս տարի թանկացնել իրենց արտադրանքը` կապված կտորի թանկացման հետ:
Շուկայի մասնակիցները ենթադրում են, որ հագուստի գինը կշարունակի աճել առաջիկա ամիսներին, քանի որ այս պահին վաճառվող հագուստը արտադրված է այն բամբակից, որը որ հավաքվել է ավելի քան կես տարի առաջ, երբ նրա գինը կրկնակի էժան էր: Հնդկաստանում չդադարող անձրևները, ինչպես նաև Ավստրալիայի ու Պակիստանի ջրհեղեները կրճատել են բամբակի մատակարարման ծավալները:
