Այսօր՝ հուլիսի 14-ին, ավտովթար է տեղի ունեցել Տավուշի մարզում:
Ֆոտոլրագրող Գագիկ Շամշյանը News.armeniatv.com-ին հայտնել է, որ ժամը 18.45-ի սահմաններում Իջևան քաղաքի բնակիչ 26-ամյա Էդվարդ Աղասարյանը, վարելով «ԳԱԶ ՍԱԶ 3507» մակնիշի 08 ՍՕ 248 համարանիշի ավտոմեքենան, բախվել է ՀՀ ՊՆ-ին պատկանող «ԿԱՄԱԶ 5320» մակնիշի ՊՆ 2839 Տ համարանիշի մեքենայի հետնամասին, որի հետևանքով «ԳԱԶ ՍԱԶ»-ի վարորդը տեղում մահացել է:
Դեպքի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի 2-րդ դասակի աշխատակիցները՝ վաշտի հրամանատարի տեղակալ Կարեն Մատինյանի գլխավորությամբ:
Դեպքի վայր են ժամանել նաև ՀՀ Արտակարգ իրավիճակների նախարարության Տավուշի մարզի Փրկարարական ծառայության փրկարարները, որոնք հատուկ տեխնիկայի միջոցով կտրել են մեքենան և դուրս բերել մահացածի դին:
Տեսնելով որ շտապօգնության բրիգադը այդպես էլ չի ժամանել դեպքի վայր, մահացածի հայրը իր ավտոմեքենայով և ճանապարհային ոստիկանի ուղեկցությամբ որդու դին տեղափոխել է Բերդի հիվանդանոց:
Դեպքի վայրում քննչական աշխատանքներն իրականացրել է Ոստիկանության քննչական գլխավոր վարչության Տավուշի մարզի քննչական բաժնի Բերդի քննչական բաժանմունքի քննիչ Մերուժան Գալստյանը:
Վթարի վայր է ժամանել նաև ՀՀ ՊՆ Տավուշի մարզի Բերդի տարածաշրջանի զինվորական ոստիկանության պետ Դավիթ Դավթյանը:
Գ. Շամշյանը հայտնել է նաև, որ ՊՆ-ին պատկանող նշված «ԿԱՄԱԶ»-ով զինվորական սնունդ էր տեղափոխվում:
