Գյումրիի քաղաքապետ Վարդան Ղուկասյանը հերքել է տեղեկություններն այն մասին, որ ՀՀԿ-ն որոշում է կայացրել Ղուկասյանին չառաջադրել որպես քաղաքապետի թեկնածու և թույլ տալ, որ առաջադրվի և անցնի ԲՀԿ թեկնածու Սամվել Բալասանյանը:
Գյուրիի քաղաքապետի ընտրությունները տեղի են ունենալու սեպտեմբերին: Վարդան Ղուկասյանը ոչ միայն հերքել է, այլև հայտարարել, որ ինքը կուսակցական որոշումներով չի առաջնորդվում, ինչպես նաև կարծում է, որ «ՀՀԿ-ն խոհեմ կուսակցություն» է և նման բան չի անի: Այսպիսով` Վարդան Ղուկասյանը ըստ էության սպառնում կամ շանտաժում է ՀՀԿ-ին` եթե իրեն ստիպեն հանել թեկնածությունը, ապա շատ «անխոհեմ» բան արած կլինեն:
Վարդան Ղուկասյանից հրաժարվելու ՀՀԿ մտադրության մասին խոսակցությունների հիմք հանդիսացավ այն հանգամանքը, որ մայիսի 6-ի խորհրդարանական ընտրություններում Գյումրիում ՀՀԿ-ն պարտվել էր «Բարգավաճ Հայաստան»-ին թե մեծամասնական, թե համամասնական ընտրակարգով: Գյումրիում ՀՀԿ խայտառակ արդյունքը Շիրակի մարզպետն ու Գյումրիի քաղաքապետը գցում էին միմյանց վրա:
Հիմա, երբ Վարդան Ղուկասյանը պնդում է առաջադրվելու մտադրությունը ու նաև շանտաժում կամ սպառնում ՀՀԿ-ին, կարծես թե ակնհայտ է, որ պատասխանատվությունը մնացել է նրա վրա, և նա այսպիսով փորձում է պաշտպանել իր դիրքերը Գյումրիում:
Բանն այն է, որ Ղուկասյանը թողնելով Գյումրիի քաղաքապետի պաշտոնը` կարող է ընդհանրապես, իր կլանով հանդերձ, քաղաքում հայտնվել շատ ծանր վիճակում, առավել ևս, եթե այնտեղ իշխանության գա ԲՀԿ-ն: Իսկ ՀՀԿ-ն, ի դեպ, կարող է քաղաքական գործարքի շրջանակում Գյումրին տալ ԲՀԿ-ին, որպեսզի վերջինս էլ նախագահական ընտրություններում որևէ կերպ կանոնները չխախտի և ՀՀԿ-ին տհաճ անակնկալներ չմատուցի:
Սակայն հետաքրքրական է նաև մեկ այլ ուշագրավ բան` ի՞նչ է անելու Վարդան Ղուկասյանը, եթե հանկարծ ՀՀԿ-ն որոշի չսատարել նրան: Պարզ է, որ եթե ՀՀԿ-ն Ղուկասյանին չսատարի, ապա Գյումրիում նրա վիճակը կարող է շատ ծանր լինել: Բայց ինչո՞վ կարող է Ղուկասյանը ստիպել ՀՀԿ-ին չգնալ այդ քայլին և չպատժել իրեն խորհրդարանական ընտրությունների համար: Եվ այստեղ արդեն հետաքրքիր հարցեր են առաջանում մի քանի աղմկոտ միջադեպերի վերաբերյալ:
Մասնավորապես, խորհրդարանական ընտրությունից մի քանի օր առաջ Վարդան Ղուկասյանի դստեր փեսացուի սպանությունը, որը Ղուկասյանն անմիջապես կապեց «Բարգավաճ Հայաստան»-ին մերձ շրջանակների հետ, իսկ իշխանությունն անմիջապես՝ դեռ առանց նախաքննության, ոստիկանապետ Վովա Գասպարյանի շուրթերով հերքեց այդ վարկածը: Եվ նաև տարիներ առաջվա վաղեմության միջադեպը` արդեն անձամբ Վարդան Ղուկասյանի հետ, երբ Երևանում ՀՀԿ խորհրդի նիստից հետո Գյումրի վերադառնալիս Ղուկասյանը դարձավ մահափորձի թիրախ և ծանր վիրավորվեց:
Հետաքրքիր է` սրա՞նք են արդյոք այն ռեսուրսները, որով Վարդան Ղուկասյանը ՀՀԿ-ին «խոհեմության» կոչ է անում:
