Ֆրանսիայի նախագահ Ֆրանսուա Օլանդն այսօր ընդունել է իր առաջին ռազմական շքերթը ազգային տոնի` Բաստիլի գրավման օրը, որն ավարտվել է տհաճ նոտայով` պարաշյուտիստներից մեկը վայրէջքի ժամանակ վնասել է ծունկը:
Շքերթն ավանդաբար սկսվել է Հաղթական կամարի շուրջ զորքերի շքերթը դիտելով, ապա Ֆրանսիայի նախագահը մեկնել է Համաձայնության հրապարակ ու տեղ զբաղեցրել առաջին շարքում, նրա հետ եղել է նաև վարչապետ Ժան-Մարկ Էյրոն, Սենատի նախագահ Ժան-Պիեռ Բելն ու Եվրախորհրդարանի նախագահ Մարտին Շուլցը:
Ելույթ է ունեցել ռազմաօդային ուժերի նվագախումբը: Ֆրանսիայի երկնքով սավառնել է ընդհանուր առմամբ 60 ինքնաթիռ, այդ թվում՝ «Ռաֆայել» կործանիչներ «Նորմանդիա-Նեման» դիվիզիայից:
Շքերթին մասնակցել են նաև գերմանական 291-րդ հետևակային գումարտակի զինծառայողներ, որոնք 2010-ից ծառայում են Ստրասբուրգի մոտ ֆրանս-գերմանական բրիգադում: Ընդհանուր առմամբ, շքերթին մասնակցել է գրեթե 5000 զինծառայող, ռազմական ու ոստիկանական ուսումնական հաստատությունների ուսանողներ, հրշեջ-փրկարարներ ու ոստիկանության աշխատակիցներ:
Ելիսեյան պալատի մոտ սավառնել է շուրջ 30 ռազմական, քաղաքացիական ու թեթև ինքնաթիռներ: Շքերթի ավարտին ուղղաթիռից ցատկել են 11 պարաշյուտիստներ, որոնցից մեկն անհաջող վայրէջք է կատարել: Մինչ նրա գործընկերները Օլանդի առաջ ծածանում էին Ֆրանսիայի ու Եմ դրոշները, պարաշյուտիստը պառկած սպասում էր օգնության: Վերջապես նրան տեղափոխում են մի քանի տասնյակ մետր հեռու ու այդ ժամանակ էլ նրան է մոտենում Օլանդը: «Ես ներողություն եմ խնդրում», – ասել է պարաշյուտիստը:
«Հուսով եմ` Դուք վատ հիշողություն չեք ունենա արարողությունից: Մինչ հաջորդ տարի»,- ասել է Ֆրանսիայի նախագահը` բժիշկներին հանձնարարելով հոգ տանել նրա մասին: Ապա նախագահը մոտեցել է մարդկանց, բաժանել մի քանի ինքնագիր, սեղմել մի քանի տասնյակ մարդկանց ձեռքն ու հեռացել:
