Թեև Սևանա լճի ավազանում այս տարի գործում է 5 հանրային լողափ, սա չի խանգարում, որ լճափին տարածք վարձակալած անձինք շարունակեն իրենց գները սահմանել Սևանա լճի ափին հանգստանալ ցանկացողների համար: Եթե գործում է 5 հանրային լողափ, գործում են դրա տասնապատիկի չափ վճարովի լողափեր: Վերջիններս իրարից առանձնանում են իրենց առաջարկած ծառայությունների որակով, բազմազանությամբ, գնային քաղաքականությամբ, առաջարկած ժամանցային կենտրոններով:
Վճարովի լողափերում հատուկ սահմանված գին կա մի գիշերակացի, մի քանի ժամ լողափին անցկացնելու, հավելյալ ծառայություններից օգտվելու համար: Կան լողափեր, որտեղ առանձին գին է սահմանված սանհագույցից օգտվելու, արևայրուք ընդունելու հատուկ աթոռների, սնունդ պատրաստելու հարմարանքներից օգտվելու համար, կան նաև տեղեր, որտեղ դրսից բերած կամ սեփական պատրաստած ուտելիք չես կարող ուտել, կա նախապայման` պետք է օգտվել միայն վճարովի լողափի առաջարկներից: Այստեղ հարմար առաջարկ կարող են գտնել և՛ համեստ գումար ունեցողները, և՛ էլիտար հաճույքներից օգտվել ցանկացողները:
Ինչպես «Առաջին լրատվական»-ի հետ զրույցում տեղեկացրեց Գեղարքունիքի մարզպետարանի բնապահպանական բաժնի պետ Համբարձում Համբարձումյանը, ոչ ոք, ոչ մի կառույց պատասխանատու չէ Սևանա լճի ափը վարձակալած մասնավորի սահմանած գների համար: Ըստ Հ. Համբարձումյանի` նրանք իրենց վարձակալած տարածքում կարող են սահմանել իրենց ցանկացած գինը: «Վճարովի լողափ հասկացություն գոյություն չունի, հիմնականում գին են սահմանում որոշակի ծառայություններից օգտվելու համար:
Օրինակ` Շորժա լողափում երկու հանգստյան տուն գոյություն ունի` Նկարիչների տունը և Բժշկական համալսարանի հանգստյան տունը, անցյալ շաբաթ, երբ ցուրտ էր, 1000 դրամով էլ խնդրում էին գնալ հանգստանալու։ Հաջորդ շաբաթ, երբ շոգը խեղդում էր, և պահանջարկը շատ էր, դրանց գներն ավելացան, քանի որ այդ գները շարժուն են, փոփոխական»,- նշեց Համբարձում Համբարձումյանը` շարունակելով, որ միայն լողալու համար ոչ ոք իրավունք չունի որևէ մեկից գումար գանձելու: Ըստ նրա` եթե ցանկություն են հայտնում ծառայություններից օգտվել, կարող է վարձակալն ասել, որ այն արժե 1000 ԱՄՆ դոլար:
Նշենք, որ Սևանա լճում կան հարյուրավոր վճարովի լողափեր, որոնցից մի քանիսում մեկ օր մնալն արժե անգամ մինչև 80 հազար դրամ: Կան նաև ավելի «հարմար» տարբերակներ՝ 20-25-30 հազար դրամ: Կան նաև գիշերակացի համար նախատեսված տնակներ՝ 5000 դրամ օրավարձով:
