2004 թվականին Պաղեստինի առաջնորդ Յասիր Արաֆաթի մահվան պատճառը եղել է ուղեղի մեծածվալ արյունազեղումը: Այս մասին նշվում է այն փաստաթղթերում, որոնք հրապարակվել են «Յասիր Արաֆաթ հիմնադրամի» կայքում:
Այսպես, փարիզյան Կլամար արվարձանի Percy զինվորական հոսպիտալի բժիշկների եզրակացությունների համաձայն, որոնք թվագրվում են 2004 թվականի նոյեմբերի 18-ով, Պաղեստինի նախկին ղեկավարի մահը վրա է հասել գլխուղեղի արյունազեղման պատճառով: Ընդ որում՝ բժիշկները նշել էին մի շարք բարդություններ, որոնք կարող էին բարդացնել Արաֆաթի վիճակը:
Մասնավորապես նա տառապում էր մարսողական օրգանների հիվանդություններից, այդ թվում նաև էնտերոկոլիտից: Ինչ վերաբերվում է Արաֆաթի օրգանիզմի արյունագոյացման համակարգին , ապա մասնագետները նրա մոտ ախտանշել էին գեմոֆագոցիտոզ: Բացի այդ՝ հիվանդությունն անդրադրաձել է նաև լյարդի վիճակին: Նշվում է, որ կյանքի վերջին օրերին Արաֆաթը տառապել է նաև դեղնախտով:
Հիվանդությունն ազդել է նաև նախկին առաջնորդի նյարդային համակարգի վրա:
