RadanMac խանութը առաջարկում է Apple ընկերության լավագույն արտադրանքը` նոր iPad-ները, iPhone-ները, iPod-ները, դյուրակիր ու սովորական համակարգիչները և ավելին:
Բայց սա սովորական Apple-ի խանութ չէ: Այն գտնվում է Թեհրանում, որտեղ Apple ընկերությունը և մյուս ամերիկյան ընկերությունները արգելված են ԱՄՆ պատժամիջոցների պատճառով: Չնայած էմբարգոյին, RadanMac-ը հարյուր խանութներից մեկն է Թեհրանում, որոնք ազատորեն վաճառում են Apple-ի արտադրանքը, չնայած մի փոքր ավելի բարձր գնով, քան ԱՄՆ-ում է:
Խանութի սեփականատեր Մաջիդ Թավասոլին ասել է , որ բիզնեսը վերջին երեք տարիների ընթացքում ծաղկում է ապրում: Նա ասել է, որ իր ընկերությունն ունի 20 հոգուց բաղկացած անձնակազմ և իրանցիներին Apple-ի արտադրանքն է մատակարարել 1995 թվականից սկսած:
Reuters-ը հաղորդում է, որ Իրանում Apple-ի նման վաճառքը ցույց է տալիս, որ ԱՄՆ-ի և այլ երկրների կողմից Իրանին ներկայացված տնտեսական պատժամիջոցների սահմանափակումներն այնքան էլ խիստ չեն: Հիշեցնենք, որ Վաշինգտոնը և նրա դաշնակիցները Իրանի նկամամբ պատժամիջոցներ են սահմանել` հույս ունենալով այդ կերպ դադարեցնել Իրանի միջուկային ծրագրի զարգացումը, չնայած որ Թեհրանն ասում է, որ այն միայն խաղաղ նպատակներ ունի:
