Հայաստանում ամենաթողությունն արմատացավ Պողոս Պողոսյանի սպանությամբ. այսօր ԱԺ-ի մոտ «Պահանջում ենք ԱԺ արտահերթ նստաշրջան» ակցիայի ժամանակ լրագրողների հետ ճեպազրույցի ընթացքում այս մասին ասաց ԱԺ «Ժառանգություն» խմբակցության պատգամավոր Զարուհի Փոստանջյանը` խոսելով ԱԺ 4 արտակոալիցիոն ուժերի ձեռնարկած՝ արտահերթ նստաշրջան անցկացնելու պահանջով ստորագրահավաքի և հունիսի 17-ին ԱԺ ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում տեղի ունեցածի պատճառների շուրջ:
Խոսելով նախաձեռնության վերաբերյալ ԲՀԿ կեցվածքից` ասաց, թե ցավում է, որ անդրադառնում են միայն այս նախաձեռնությանը, քանի որ օրեր առաջ ԲՀԿ-ն կողմ քվեարկեց Սևանա լճից ոռոգման նպատակով հավելյալ ջրի բացթողնման օրինագծին, որը մեծ տնտեսական խնդիր էր, և եթե ԲՀԿ-ն իրապես դեմ էր կառավարությանը, սա կառավարության ապաշնորհ ծրագրի հետևանք էր: «Եթե դրան կողմ են քվեարկում, ուրեմն ամեն ինչ մեզ համար պարզ է: Մյուս կողմից էլ կարող եմ ասել, որ ԲՀԿ-ում կան անձինք, ովքեր առնչություն են ունեցել հանցագործությունների հետ, որոնք վտանգել են մարդու կյանքը և առողջությունը, հետևաբար այս մարդիկ ինչպե՞ս կարող են գալ և իրենց համաձայնությունը տալ, թեև սա միայն ԲՀԿ խնդիրը չէ, սա համակարգային խնդիր է, և այս նախաձեռնությունը, որը շրջանառության մեջ է դրվել ընդդիմության կողմից, պետք է զորակցություն ստանա ոչ միայն խմբակցությունների կողմից, այլև բոլոր այն մարդկանց, ովքեր ներկայացնում են մեր հասարակությանն ԱԺ-ում: Նրանք պետք է, իրենց քաղաքացիական պարտքը կատարելով, գային և միանային այս նախաձեռնությանը»,- մեկնաբանեց պատգամավորը` շարունակելով, որ այսօր ունենք հասարակական պահանջ՝ գնահատական տալ այս արատավոր երևույթներին, որի նախադեպը մենք ԱԺ-ում չենք ունեցել: Ըստ նրա` գնահատականը պետք է լինի ոչ միայն իրավական:
Զարուհի Փոստանջյանի խոսքով` այսօր Վահե Ավետյանի հետ պատահած դժբախտությունը և մեր հասարակությունում տեղի ունեցողը արատավոր երևույթների շղթայի մի մասն են։ Վահե Ավետյանի սպանության փաստը ծառի մի ճյուղն է, իսկ այս երևույթի առավել արմատացումը տեղի ունեցավ 2001 թվականին Պողոս Պողոսյանի սպանությունից հետո: «Անպատժելիության, ամենաթողության մթնոլորտն առավել արմատացավ այդ շրջանից սկսած: Դրանից հետո մենք բոլորս ականատեսը եղանք բազմաթիվ նման արտառոց երևույթների, բացի այդ, նաև անպատժելիության»,- ասաց Զարուհի Փոստանջյանը:
Հիշեցնենք, որ երեկ ԱԺ 4 արտակոալիցիոն ուժերի նախաձեռնությամբ սկսվել է ստորագրահավաք ԱԺ արտահերթ նստաշրջան անցկացնելու պահանջով՝ Ռուբեն Հայրապետյանին պատգամավորության մանդատից զրկելու նպատակով, որից պատգամավորը սեփական կամքով հրաժարվել էր օրեր առաջ: Ստորագրահավաքը կավարտվի այսօր ժամը 18.00-ին:
