2010թ. հունվարի 10-ին «Մոսկվա» կինոթատրոնում գողություն կազմակերպելու և իրականացնելու մեղադրանքով 2010թ. փետրվարի 6-ից կալանավորված Ստեփան Հովակիմյանի և Վահրամ Քերոբյանի գործով դատավարությունը դեռ շարունակվում է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում: Ստեփան Հովակիմյանը մինչ օրս չի կարողանում դատարանում ապացուցել, որ իրենից վերցված այն ցուցմունքները, որոնց հիման վրա երիտասարդները արդեն գրեթե 28 ամիս է` կալանքի մեջ են, խոշտանգումների միջոցով են կորզվել, դրանք իրական չեն: Երիտասարդները շարունակում են պահանջել խոշտանգումների հայտարարությունների անկախ, արդյունավետ և լիարժեք քննություն իրականացնել, անթույլատրելի ճանաչել բռնության և ճնշումների միջոցով ստացված ապացույցները, ապահովել իրենց` ողջամիտ ժամկետում արդար դատաքննության իրավունքի իրականացումը:
Կենտրոն և Նորք-Մարաշ վարչական շրջանների ընդհանուր իրավասության դատարանում այս գործով երեկ շարունակված դատավարությանը դատարանը կրկին անգամ հարցաքննել է տուժողի ներկայացուցիչ, կինոթատրոնի փոխտնօրեն Նորայր Ազատյանին և կինոթատրոնի գլխավոր հաշվապահ Նինա Ադոյանին: Դատարանը նրանցից պետք է պարզեր, թե որտեղ է այն համակարգիչը, որում մուտքագրված են վաճառված տոմսերի վերաբերյալ և կինոթատրոնի շահույթի հետ կապված տեղեկատվությունները: Համակարգիչը փորձաքննության ենթարկելու միջնորդությունը նախորդ նիստում դատարանին էր ներկայացրել «Մոսկվա» կինոթատրոնից գողություն կատարելու մեջ մեղադրվող Ստեփան Հովակիմյանի փաստաբանը` Տիգրան Սաֆարյանը, որի համոզմամբ` դրանից է կախված` դատարանը կնշանակի՞ դատահամակարգչատեխնիկական փորձաքննություն, թե՞ ոչ:
Կինոթատրոնի փոխտնօրեն Նորայր Ազատյանը և կինոթատրոնի գլխավոր հաշվապահ Նինա Ադոյանը, սակայն, երեկ դատարանում հայտարարեցին, թե վաճառված տոմսերի վերաբերյալ տեղեկատվություն պարունակող համակարգիչը դուրս է գրվել մեկ տարի առաջ: Այսինքն` պաշտպան Տիգրան Սաֆարյանի կողմից դատահամակարգչատեխնիկական փորձաքննություն անցկացնելու միջնորդությունը հնարավոր չի լինի իրականացնել: Սակայն այս պարագայում հետաքրքիրն այն է, որ դատավոր Պապոյանը չի բավարարել պաշտպան Տիգրան Սաֆարյանի կողմից ներկայացված 2 միջնորդությունները, որոնցով փաստաբանը դատարանից խնդրում էր «ԱրմենՏել» ՓԲԸ-ից պահանջել և վերցնել այս գործով վկա Նինա Ադոյանի, ինչպես նաև «Մոսկվա» կինոթատրոնի քաղաքային հեռախոսահամարների, կինոթատրոնի տնօրենի ու փոխտնօրենի անձնական հեռախոսահամարների մուտքային ու ելքային զանգերի վերծանումներն ու սպասարկած ալեհավաքների մասին տեղեկությունները` գողության օրից մինչև Հովակիմյանին ձերբակալելու օրն ընկած ժամանակահատվածում, այսինքն` հունվարի 10-ից փետրվարի 6-ը: Դրանք, ըստ պաշտպանի, կփարատեին գողացված գումարի ու Ադոյանի` աշխատանքի հաճախելու կամ չհաճախելու վերաբերյալ իրենց ունեցած կասկածները: Դատավոր Մխիթար Պապոյանը, սակայն, համարեց, որ այդ տեղեկությունները ստանալը կապված է անձի անձնական կյանքի իրավունքների հետ, իսկ Տիգրան Սաֆարյանի ներկայացրած միջնորդությունն, իր պատճառաբանությամբ, բավարար չէ այն բավարարելու համար:
Դատարանը փաստաբանների խնդրանքով «Մոսկվա» կինոթատրոնի փոխտնօրենին խնդրեց հաջորդ դատական նիստին ներկայացնել այն փաստաթղթերը, որոնցով կհիմնավորվի համակարգչի դուրսգրումը:
Երեկվա նիստում ցուցմունք տվեց նաև «Գորիսի» ՔԿՀ-ից բերված գործով վկա, ամբաստանյալ Կարեն Կարապետյանը, ով եղել է Հովակիմյանի խցակիցներից մեկը, երբ Հովակիմյանին առաջին անգամ տարել են կալանավայր՝ Հովակիմյանի պնդմամբ, խոշտանգումների ենթարկելուց հետո:
Դատապարտյալը նշեց, որ երբ Հովակիմյանին խուց են բերել, նա հաճախ բժշկի օգնության կարիք է ունեցել, ոտքերը ցավել են, քայլել չի կարողացել, գլուխն է ցավել: Դատական հաջորդ նիստը նշանակվել է հուլիսի 17-ին:
