ՀՀ ֆինանսների նախարարության Գնումների աջակցման կենտրոնի ծառայություններից օգտվելն ըստ ցանկության է: Ինչպես «Առաջին լրատվական»-ին հայտնեց ՀՀ ֆինանսների նախարարության Գնումների աջակցման կենտրոնի պետի տեղակալ Արթուր Առաքելյանը, եթե կա ցանկություն, գիտելիքների կամ ռեսուրսների պակաս, օրինակ՝ մարդ կա, որ տնօրեն, հաշվապահ և զուտ մասնագիտական անձնակազմ է պահում, տարին 3-4 մրցույթի է մասնակցում և գտնում է, որ կարիք չունի գնումների համար հատուկ մասնագետ ներգրավել, և այդ դեպքում հաշվարկի խնդիր է՝ պահել առանձին մասնագետ, թե օգտվել կենտրոնի ծառայություններից:
«Այդ գումարները շատ խիստ պայմանական են. օրինակ՝ մասնագետ պահելու համար կվճարեն ամսական 120 հզ. դրամ, իսկ մեր ծառայություններից օգտվելու համար կվճարեն 5-7 հզ., կան նաև բազմաթիվ ծառայություններ, որոնք անվճար են, նաև խորհրդատվություններն են անվճար: Սահմանված վճարները մատչելի են և օբյեկտիվ, որովհետև այդ գործողությունները մենք պետք է կատարենք իրենց փոխարեն»,- ասաց Ա.Առաքելյանը:
Նրա կարծիքով՝ գործարարների առաջարկությունը՝ ծառայության վճարը սահմանել եկամտից որոշակի տոկոսի չափով, ոչ օբյեկտիվ կլինի, քանի որ, օրինակ, շինարարությունը 20 մլն դրամի կամ 500 մլն դրամի դեպքում 20 անգամ տարբեր կլինի, թեև նույն ծավալի ծառայություն է մատուցվելու. «Ամեն դեպքում մենք պայմանավորվել ենք, որ քննարկվի այդ տարբերակը»:
