Ամառային հանգիստն իր ամբողջ հմայքով ներկայանում է հուլիս և օգոստոս ամիսներին: Այս շրջանում բոլորն են ծրագրում գտնել ամառային հանգստի մատչելի տարբերակներ: Վերջին տարիներին շոգից պատսպարվելու հայերի համար նախընտրելի և մատչելի միջոցը շարունակում է մնալ հանգիստը Վրաստանի ծովափնյա քաղաքներում: Այստեղ և՛ ճանապարհածախսն է մատչելի, և՛ գիշերակացը, և՛ մատուցված ծառայությունները: Դա են փաստում «Առաջին լրատվական»-ի կատարած հարցումները ներգնա տուրիզմի ոլորտում աշխատող մասնագետների և տուրիստական գործակալությունների ներկայացուցիչների հետ:
Հայաստանում ներգնա տուրօպերատորների միության նախագահ Ալեքսան Զաքյանն «Առաջին լրատվական»-ի հետ զրույցում ասաց, որ պետական սոցփաթեթների ներդրման հետ խթանվեց ներքին տուրիզմի զարգացումը: Ըստ նրա` Հայաստանում ներգնա տուրիզմի ներկայիս վիճակը պայմանավորված է բարձր գներով և մատուցված ծառայությունների որակով, դա է պատճառը, որ մեր շատ հայրենակիցներ նախընտրում են իրենց հանգիստն արտերկրում անցկացնել: Ալեքսան Զաքյանի խոսքով` բարձր գները պայմանավորված են պահանջարկ-առաջարկ շուկայական հարաբերություններով:
«Նույնիսկ այն մարդիկ, ովքեր արտասահմանից են գալիս Հայաստան, արձանագրում են, որ հյուրանոցները շատ թանկ են, քանի որ մենք պարզապես հյուրանոցներ չունենք: Հայաստանում անիմաստ թանկանում են տուրպակետները` զուտ պահանջարկ-առաջարկով պայմանավորված, նաև նրանով, որ շատ քիչ հյուրանոցային համարներ ունենք, որը հանգեցնում է հյուրանոցների, հանգստյան տների կողմից արհեստական գների բարձրացման: Մենք համապատասխան քանակի տեղ չունենք, որից առաջին հերթին տուժում է Հայաստանի բնակիչը»,- մեկնաբանեց մասնագետը` շարունակելով, որ հարևան երկրներում` Ադրբեջանում և Վրաստանում, խնդիրն այլ է, քանի որ իրենց մոտ տարեցտարի նոր հյուրանոցներ են կառուցվում, այդ երկրներում պետականորեն մեծ նշանակություն է տրվում մատուցված ծառայությունների որակին, իսկ Հայաստանում այս հարցերը լուրջ ուսումնասիրության առարկա չեն դառնում:
Նա նշեց, որ եթե համեմատում ենք Հայաստանում և արտերկրում հանգստանալը, հասկանում ենք, որ ավելի մատչելի է դրսում հանգստանալը, քանի որ այնտեղ հանգստի համար նախատեսված գումարը ներառում է ավիատոմսի արժեքը, մատուցվում են էժան և ավելի որակյալ ծառայություններ, ուստի բնական է, որ մարդիկ նախընտրում են դուրս գնալ: Նրա խոսքով` մարդիկ նաև նախընտրում են Սևանի փոխարեն հանգստանալ Վրաստանի ծովափերում, քանի որ այստեղ ավելի մատչելի է, ծովային հանգիստը ամենամատչելին Վրաստանում է` կարող են սեփական մեքենայով գնալ կամ գնացքով, գիշերակացը ևս մատչելի է, սակայն ով չի բավարարվում այս պայմաններով, ավելի բարձրակարգ ծառայություններով ծովափեր է մեկնում:
«Սիրով Թրավել» տուրիստական գործակալության տնօրենը նշեց, որ նախորդ տարվա համեմատ Հայաստանում հանգստյան տների զբաղվածությունը նույնն է, որովհետև հուլիս-օգոստոս ամիսները բարձր սեզոններ են և այս ժամանակահատվածում հյուրանոց գտնելը միշտ խնդիր է: «Մարդկանց մի մեծ մաս հանգստանում է Վրաստանում, մի մեծ մասը` Թուրքիայում, ապահովված ընտանիքները հանգստանում են Կիպրոսում, Բուլղարիայում և այլ հանգստյան գոտիներում»,- ասաց տուրիստական գործակալության ներկայացուցիչը: Նա նաև ասաց, որ բոլոր հանգստյան գոտիներում էլ կան ավելի մատչելի տարբերակներ, սակայն առավել անորակ ծառայությունների մատուցմամբ, և կան նորակառույց, լավ պայմաններով հյուրանոցներ, որոնք ավելի թանկ են:
«Առաջին լրատվական»-ը փորձեց պարզել, թե նախորդ տարվա համեմատ այս տարի որքան է ավելացել Վրաստան մեկնողների թիվը նույն ժամանակահատվածում: «Առաջին լրատվական»-ի հետ զրույցում «Հարավկովկասյան երկաթուղի» ընկերության մամլո քարտուղար Վահե Դավթյանն ասաց` հունիսի 15-ից հուլիսի 10-ը Վրաստան է տեղափոխվել է 4348 ուղևոր, սա 26%-ով գերազանցում է 2011 թվականի նույն ժամանակահատվածի ցուցանիշը: Նկատենք, որ նախորդ տարի նույն ժամանակահատվածում տեղափոխվել էր 3439 ուղևոր:
