Վաղը երեկոյան տոնվելու է հայկական տոնացույցի սիրված տոներից մեկը` Տեառընդառաջը:
Տոնի անվանումը գալիս է հետևյալ ավանդույթից. Հովսեփն ու Մարիամը մանուկ Հիսուսին տանում են տաճար: Սիմեոն անունով մի ազնիվ ու արդար մարդ, Հիսուսին տեսնելով` հասկանում է, որ նա փրկություն ու լույս կլինի մարդկանց համար և ընդառաջ է գալիս նրանց: Այստեղից ել առաջացել է «Տեառնընդառաջը», որը նշանակում է տիրոջն ընդառաջ, և նվիրված է քառասնօրյա Հիսուսին տաճար բերելուն:
Ինչպես տեղեկացնում է աստվածաբան Նիկադիմ Յուխանաևը, եկեղեցում օրը փոխվում է երեկոյան ժամերգությունից հետո, ուստի Տեառնընդառաջը սկսվում է տոնվել փետրվարի 13-ին` ժամերգությունից սկսած, ու տևում է մինչև փետրվարի 14-ը երեկոյան:
Արարողությունները սկսվում են ժամերգությամբ, որից հետո երգվում է Լույս զվարթ շարականը: Որից հետո խարույկ են վառում: Քահանայի օրհնությունից հետո վառում են եկեղեցու բակի մեծ խարույկը:
Ժողովրդական տոնախմբության ժամանակ բարեկամները հավաքվում են նորահարս ունեցող ընտանիքում, վառվում է խարույկ, որի կրակը բերվում է եկեղեցուց: Կրակի վրայով թռչելը միայն ժողովրդական ավանդույթ է և չի կրում քրիստոնեական խորհուրդ:
