Գերմանացիները համացանցի միջոցով ստորագրւթյուն են հավաքում Բունդեսթագի կողմից ընդունված՝ անձնական տվյալների մասին նոր օրենքի դեմ: Ինչպես հաղորդում է Spiegel-ը, իրենց ստորագրությունն այնտեղ թողել է արդեն ավելի քան 120 հազար մարդ: Նոր օրենքը թույլ կտա պետական ծառայություններին մասնավոր ընկերություններին վաճառել մարդկանց՝ իրենց տրամադրության տակ եղած անձնական տվյալները:
Գերմանացի իրավապաշտպանների կարծիքով՝ այդ օրենքը խախտում է քաղաքացիների իրավունքները, քանի որ նրանք, վերջին հաշվով, չեն կարողանա ինքնուրույն տնօրինել իրենց տվյալները:
Բունդեսթագում օրենքի քվեարկությունը տեղի կունենա սեպտեմբերին:
Իրավապաշտպանները նախատեսում էին մինչ այդ ժամկետը հավաքել 100 հազար ստորագրություն, որպեսզի դրանք փոխանցեն իշխանություններին: Սակայն անհրաժեշտ քանակությունն արդեն հավաքվել է հենց առաջին օրերին:
Քաղաքացիների վրդովմունքն է առաջացրել ոչ միայն օրենքը, այլև այն, թե ինչպես է այն ընդունվել Բունդեսթագում: Քվեարկությունը տեղի է ունեցել հունիսի 28-ին՝ Եվրո 2012-ի Գերմանիա-Իտալիա կիսաեզրափակչի խաղին զուգահեռ: Արդյունքում քվեարկությանը 620 պատգամավորներից մասնակցել է միայն 27-ը: Նրանցից մոտ մեկ րոպե ժամանակ է պահանջվել հարցը լուծելու համար. իշխող կոալիցիայի ձայներով օրինագիծն ընդունվել է: Այժմ ընդդիմությունը պատրաստվում է արգելափակել այն Բունդեսթագում, որտեղ իրենք մեծամասնություն են կազմում:
