Ռուսական ներդրումները Հայաստանում, դժբախտաբար, ոչ մի կերպ արդարացված չեն: Նման գնահատական «Առաջին լրատվական»-ի հետ զրույցում տվեց ԱԺ պատգամավոր, «Ազատ դեմոկրատներ» կուսակցության նախագահ Խաչատուր Քոքոբելյանը: Նրա խոսքով` ռազմավարական առումով մենք այլ պետությանն ենք զիջել այնպիսի ոլորտներ, որոնք ունեն ռազմական և պետության անվտանգության համար շատ վճռորոշ նշանակություն:
«Առաջինը՝ մերթ ընդ մերթ գազի գների բարձրացումը կամ գազի գները Հայաստանի վրա լրացուցիչ որպես լծակ օգտագործելը, ճնշում գործադրելը թե՛ սոցիալական, թե՛ անվտանգության առումով, բնականաբար, ինքնին խոսում է այն մասին, որ այդ ոլորտն ամբողջովին հանձնելը այլ պետության տնօրինությանը պարզապես ռազմաքաղաքական առումով ՀՀ քաղաքացու շահերից չբխող հանգամանք է, և դա անթույլատրելի է, կարելի է ասել նույնիսկ հանցագործություն»,- ասաց Խ.Քոքոբելյանը:
Պատգամավորի կարծիքով, դրական չէ իրավիճակը նաև կապի ոլորտում. «ՀՀ-ում կապը շատ վատ է գործում, նաև գները շատ բարձր են, քան շատ այլ շուկաներում, և մրցակցություն չի ապահովվում, քան որ գործող սուբյեկտները կորղանում են իրար մեջ ընդհանուր հայտարարի գալ և ոչ թե սպառողների, այլ բուն ներդրողների շահերից բխող որոշումներ կայացնել»:
Էլեկտրական ցանցերն, ըստ նրա, շատ, թե քիչ աշխատող մասն է, որ որոշ չափով ներդրումներ արվել են, բայց դեռ շատ-շատ աշխատանքներ կան, որ չեն արվում: Մասնավորապես, էլեկտրաէներգիայի կորուստների չափն անսահման մեծ է, ինչը սարքավորումների հին լինելու հանգամանքով է պայմանավորված, իսկ ըստ պայմանագրի պետք է ներդրումներ արված լինեին և հոսանքի նոր լարերի, նոր տեխնոլոգիանորի միջոցով պետք է կորուստները նվազեցված լինեին: Մինչդեռ, այս պահին կորուստների էական նվազեցումներ չկան:
«Իմ համոզմամբ, որևէ վերահսկման մեխանիզմ չկա, որ կարողանայինք օտարերկյա ներդրումների վերահսկողություն իրականացնել պետական որևէ կառույցի կողմից, այդ թվում և ԱԺ-ի՝ որպես օրենսդիր մարմնի, և ռեալ չեն կարող տարբերակել, թե ինչ ներդրումներ են իրականացվում: Ներդրումները թղթի վրա են ցույց տրվում, իսկ իրական ներդրումներ գոյություն չունեն»,- նշեց Խ.Քոքոբելյանը՝ հավելելով, որ գազի պարբերաբար թանկացումները խոսում են այն մասին, որ Ռուսաստանը Հայաստանի նկատմամբ որպես բարեկամ երկիր չի վարվում, այլ գործում են ոչ բարեկամական՝ վասալային հարաբերություններ:
